«Մեր երկիրը շինում են մի քանի օլիգարխ». Հրանտ Բագրատյան

Այսօր լրագրողների հետ հանդիպման ժամանակ ՀԱԿ խմբակցության պատգամավոր, «Ազատ դեմոկրատներ» կուսակցության ցուցակում ընդգրկված Հրանտ Բագրատյանը ասաց, որ Քոչարյանը, Սերժ Սարգսյանը, ամեն մեկը իր պաշտոնավարման ժամանակ 200 հազարական աշխատատեղ է ստեղծել, ստացվեց 400 հազար, բայց վերջին 20 տարում 450 հազարով աշխատատեղերը պակասել են: Այնուհետև անդրադառնալով «Հայկական վերածնունդ» կուսակցության կողմից բարձրաձայնված ավանդների վերադարձին՝ որակելով այդ սխեման ձեռառնոցի. «Ավանդների փոխհատուցում կա, ՕԵԿ-ը դրանում դեր է խաղացել, ՀՀԿ-ն ու ՀՅԴ-ն ասում են՝ մեզ մի մոռացեք այդ հարցում, բայց այդ սխեման ձեռառնոցի է, որովհետեւ ավանդները վերադարձնում ենք մեկը 30-ի հարաբերությամբ: Նախ, պետք է որոշենք, որ ավանդները պետական պարտք է: 93-ի կառավարության որոշումը կա, որ ասում ենք՝ հարգելի ժողովուրդ, մենք հիմա փող չունենք, որ ձեզ վերադարձնենք, բայց դա համարում ենք պետական պարտք: Այդ կառավարության որոշումը ոչ ոք չեղյալ չի հայտարարել: Մենք դեմ ենք մեկը 30-ի հարաբերությամբ կոպեկներ վերադարձնելու մարդկանց եւ հետո հայտարարելու, թե տեսեք ժողովուրդ ձեզ համար ինչ ենք անում»: Հ. Բագրատյանի խոսքով՝ Հայաստանում չկա ոչ մի նորմալ ներդրումային ֆոնդ. «Մեր ժողովուրդը չի աշխատում մեր երկիրը շինելու վրա: Մեր երկիրը շինում են մի քանի օլիգարխ, իրենց շինածն էլ տեսնում ենք՝ օրը մեջ մի մոլ է բացվում, ամեն մի մոլը, որ բացվում է, փակում է 2000 հատ խանութ: Ներդրում անող է եղել Քոչարյանը, Սերժ Սարգսյանը, ամեն մեկն իր նախագահության ընթացքում 200 հազար աշխատատեղ է ստեղծել, եղա՞վ 400 հազար, իսկ դուք գիտե՞ք, որ 450 հազարով աշխատատեղերը պակասել են վերջին 20 տարում: Այսինքն՝ 400 հազարը ստեղծվել է, 850 հազարը՝ պակասել: Ըտենց ներդրում մի արեք, եղբայր, նման ներդրումները պահեք ձեզ»: