Ալեք Ենիգոմշյան. Մենք այս ռեժիմի օրոք ընտրությունները համարում ենք խեղկատակություն և ֆարս

«Հիմնադիր խորհրդարանի» անդամ Ալեք Ենիգոմշյանն այսօր Հայելի ակումբում հայտարարեց, որ իշխանության նպատակը «Սասնա ծռեր» խմբի անդամներին նախընտրական շրջանում մեկուսացնելն է։ Որպես ապացույց նա մատնանշեց այն հանգամանքը, որ փաստաբան Մուշեղ Շուշանյանին թույլ չեն տվել տեսակցել «Արմավիր» ՔԿՀ-ում պահվող Ժիրայր Սեֆիլյանի հետ: Նրա պնդմամբ՝ իրենք ասելիք ունեն նաև քաղաքական այն ուժերին: «Կա ՀՀԿ, կան նրանց դաշնակից ուժեր և նրանցից բացի կան մի քանի կուսակցություններ և դաշինքներ, որ հավակնում են ներկայանալ որպես ընդդիմություն նրանց: Մեր կեցվածքն առաջին օրվանից հստակ է եղել, մենք այս ռեժիմի օրոք ընտրությունները համարում ենք խեղկատակություն և ֆարս, մենք կոչ ենք անում դաշինքներին, կուսակցություններին, կազմակերպություններին, որ ներկայանում են որպես այլընտրանք, մենք նրանց ունենք 4 հարց, և եթե իրենց նպատակը պարզապես տեղեր գրավելը չէ ր իշխանության ճաշասեղանից իրենց պատառներն ունենալը, եթե ամենայն ազնվությամբ իրենք ձգտում են մեր երկրում իրավիճակ փոխել, պիտի ճիշտ գնահատական տան այդ 4 հարցին»,- ասաց նա: Ինչպես ասաց, եթե տվյալ հարցերի նկատմամբ քաղաքական ուժերի կողմից չկան հստակ դիրքորոշումներ, ուրեմն համակարգի մասին հայտարարությունները շատ կասկածելի են դառնում։ «Այդ չորս հարցերը հետևյալներն են՝ 1. Ճշգրիտ և ամբողջական գնահատական ներկա ռեժիմին և մերժված համակարգին իրենց պատկերացումները, 2. Արցախի հարցի վերաբերյալ՝ կո՞ղմ են տարածքների հանձնմանը, թե՞՝ ոչ. 3. Հստակ դիրքորոշում՝ Հայաստանի ինքնիշխանության վերականգնման և ապագաղութացման վերաբերյալ, 4. Սասնա ծռերի քաղբանտարկյալների և Արթուր Սարգսյանի վիճակի վերաբերյալ կոնկրետ դիրքորոշում»,- նշեց Ալեք Ենիգոմշյանը