ԱՄՆ Հայ դատի հանձնախումբը Պետդեպին կոչ է արել թույլ չտալ «Երկաթե գմբեթ»-ի վաճառքն Ադրբեջանին

Հաշվի առնելով ԱՄՆ-ի տարածաշրջանի շահերը և զենքերի տարածման հետ կապված խնդիրները ՝ ԱՄՆ Հայ դատի հանձնախումբը (ANCA)կոչ է արել երկրի պետքարտուղարությանն ընդդիմանալ Իսրայելի կողմից Ադրբեջանին ամերիկյան տեխնոլոգիայով ստեղծված «Երկաթե գմբեթ» հակահրթիռային համակարգի վաճառքին: Ինչպես հաղորդում է anca.org-ը, Հայ դատի հանձնախումբը փետրվարի 13-ին նամակ է ուղղել Պետդեպարտամենտի ռազմաքաղաքական հարցերով զբաղվող բյուրոյին, որով խնդրել է ընդդիմանալ «Երկաթե գմբեթ»-ի վաճառքին, քանի որ այն, տարածաշրջանային հակամարտության վտանգները մեծացնելով, կվտանգի ԱՄՆ-ի շահերը, հետընթաց կգրանցի խաղաղության գործընթացում և հնարավորություն կընձեռնի, որպեսզի ժամանակակից սպառազինությունների տեխնոլոգիաները հայտնվեն հակաամերիկյան ուժերի ձեռքերում: Հայ դատի հանձնախումբը, վկայակոչելով տեղեկատվության ազատության օրենքը, խնդրել է նաև տրամադրել Ադրբեջանին «Երկաթե գմբեթ»-ի վաճառքին վերաբերող պաշտոնական փաստաթղթերը: Հայ դատի հանձնախմբի գործադիր տնօրեն Արամ Համբարյանը նշել է, որ «Երկաթե գմբեթ»-ը կքաջալերի Ադրբեջանի նախագահ Իլհամ Ալիևին նոր ագրեսիայի դիմել: «Այս վաճառքին կանաչ լույս տալը կխարխլի այն ամենը, ինչ Ամերիկան և ԵԱՀԿ-ի մեր գործընկերներն արել են խաղաղությանը նպաստելու և զենքերի տարածումը կանխելու համար՝ վտանգ ստեղծելով, որ ժամանակակից տեխնոլոգիան կապակայունացնի Կովկասը և հնարավոր է, որ հայտնվի հակաամերիկյան երկրների ձեռքերում՝ Բելառուսից մինչև Հյուսիսային Կորեա»,- հավելել է նա: