Շատ վտանգավոր է Ռուսաստան-Թուրքիայի միջև կատարվող ամենը

«Ազատ դեմոկրատներ» կուսակցության փոխնախագահ Անուշ Սեդրակյանը Հայելի ակումբում տեղի ունեցած ասուլիսին,անդրադառնալով   Ռուսաստանի Պետդումայի կոմունիստ պատգամավորների ՝Պուտինին ուղղված նամակին և Ռուսաստանի նախագահի կարգադրությամբ երեկ առավոտյան ռազմական պատրաստականության  Հարավային զինվորական օկրուգի ռազմակայաններում  անակնկալ ստուգումներին ասաց, որ այդ երկու իրադարձություններն անպայման իրար հետ կապված են. «Երբ ասում էի՝ շատ վտանգավոր է Ռուսաստան-Թուրքիայի միջև կատարվող այս ամենը և կարող է ազդեցություն ունենալ Հայաստանի վրա, հիմա ակնհայտ երևում է դա: Ռուսաստանը ներկա պահին որևէ տնտեսություն չունի,  բոլորը զարմանում են՝ կործանված, կքած Ռուսաստանն ինչպե՞ս է միանգամից մի քանի կոնֆլիկտներ սկսում:  Պատերազմը միակ ինդուստրիան է, որտեղ Ռուսաստանը կարող է հաջողել, որտեղ նա կարող է նստել բանակցային սեղանի առջև»: Հիշեցնենք,որ Օրերս Ռուսաստանի Պետդումայի կոմունիստ պատգամավորներ Վալերի Ռաշկինն ու Սերգեյ Օբուխովը նամակով դիմել են նախագահ Վլադիմիր Պուտինին և արտգործնախարար Սերգեյ Լավրովին՝ կոչ անելով չեղյալ համարել 1921 թվականի ռուս-թուրքական պայմանագիրը, որով Թուրքիային էին անցել Կարսի գավառը, Սուրմալուի մարզը, այդ թվում՝ Արարատ լեռը: Նաև հայտնի դարձավ, որ Ռուսաստանի նախագահի կարգադրությամբ երեկ առավոտյան ռազմական պատրաստականության անակնկալ ստուգումներ են սկսվել Հարավային զինվորական օկրուգի ռազմակայաններում, այդ թվում՝ Գյումրիում տեղակայված 102-րդ ռազմակայանում:  Դրանց շրջանակում ռազմական լիակատար պատրաստականության են բերվել Հարավային զինվորական օկրուգի բոլոր զորամասերը: