Տիգրան Արզաքանցյանը նորից որոշել է մասնակցել խորհրդարանական ընտրություններին

Հայկական ժամանակը գրում է. «Գեղարքունիքի մարզից ԱԺ նախկին պատգամավոր, գործարար Տիգրան Արզաքանցյանը նորից որոշել է մասնակցել խորհրդարանական ընտրություններին և ՀՀԿ-ի ցուցակով ռեյտինգային ընտրակարգով առաջադրվել նույն մարզում։ - Պարոն Արզաքանցյան, ինչո՞ւ որոշեցիք կրկին առաջադրվել։ Եվ դա ձե՞ր որոշումն էր, թե կուսակցությունն է ձեզ առաջարկել։ -  Իմ որոշումն էլ է, կուսակցության որոշումն էլ է։ Կիսատ գործեր կան, ես իմ աշխատանքները պիտի հասցնեմ մինչև վերջ։ -  Դուք 2 անգամ պատգամավոր եք եղել, այդ ընթացքում ինչ-որ օրինագիծ ներկայացրե՞լ եք, խորհրդարանական գործունեությամբ զբաղվե՞լ եք, որ հիմա նորից ուզում եք պատգամավոր դառնալ։ -  Ոնց չեմ ներկայացրել։ Օրենքի շատ փոփոխություններ ենք արել, որ իրենց արտադրած ապրանքները արտահանելու և արտադրելու ժամանակ կարողանան մեծ արտոնություններ, ֆինանսական աղբյուրներ ունենալ ու կամպանիաների հետ կարողանան ուղիղ պայմանագրեր կնքել ու իրենց բիզնեսն իրենց չափով զարգացնել։ - Դա ի՞նչ օրենք էր։ -14 տարի է անցել, ես չեմ հիշում։ -  Դուք տեղյա՞կ եք, որ ռեյտինգային ընտրակարգը, որով ցանկանում եք առաջադրվել, նախկին մեծամասնականը չէ: Հիմա դուք այդ ընտրատարածքում կարող եք ամենաշատ ձայները ստանալ, բայց կուսակցությունը որոշի մեկ ուրիշին պատգամավոր դարձնել։ Եվ ձեզ ընդամենը օգտագործեն ՀՀԿ-ին ձայն բերելու համար։ -   Ամեն ինչ հնարավոր է։ Ես մասնակցելու եմ ե՛ւ ինձ համար, ե՛ւ կուսակցության համար։ -   Ձեր «Գրեյթ Վելլի» ընկերությունը սնանկացավ, հիմա ի՞նչ բիզնես ունեք Հայաստանում։ - «Գրեյթ Վելլիի» հետ ես 9 տարի է, կապ չունեմ։ Ես ունեմ իմ բրենդները, որոնք տվել եմ «Գրեյթ Վելլիին» օգտագործելու, հիմա տալիս եմ այլ ընկերություններին և փոխարենը գումար եմ ստանում»,–գրում է թերթը։ Մանրամասները՝ թերթի այսօրվա համարում։