Ալիևի ու Լուկաշենկոյի խայտառակ ապտակը Հայաստանին ու Ռուսաստանին

Բլոգեր Ալեքսանդր Լապշինին տեղափոխող ինքնաթիռը երեկ վայրէջք կատարեց Բաքվում: Լապշինն այսպիսով, արտահանձնվեց Ադրբեջանին: Հայտնի բլոգերին Բաքվում Հեյդար Ալիևի անվան օդանավակայանում ուղեկցում էին դատախազության աշխատակիցները, դիմակավոր իրավապահներ, տպավորություն էր ստեղծվում, թե ծանր հանցագործի են հայտնաբերել: Հենց երեկ էլ` Բելառուսի Գերագույն դատարանը կայացած դռնփակ նիստում օրինական ճանաչեց բլոգեր Ալեքսանդր Լապշինին Ադրբեջանին արտահանձնելու մասին երկրի գլխավոր դատախազության կողմից հունվարի 20-ին կայացված որոշումը: 2011թ. ապրիլին և 2012թ. հոկտեմբերին Ալեքսանդր Լապշինն այցելել էր Արցախ, իսկ այս տարվա ապրիլի 9-ին՝ քառօրյա պատերազմից հետո, իր http//puerrtto.livejournal.com կայքում ծաղրել էր Արցախը զավթելու Բաքվի փորձերը: Ու ահա, Ադրբեջանի գլխավոր դատախազության Ծանր հանցագործությունների հարցերով քննչական կոմիտեում նրա նկատմամբ քրեական գործ է հարուցվել քրեական օրենսգրքի 281.2 (պետության դեմ ուղղված հրապարակային կոչեր հնչեցնելը) և 318.2 հոդվածներով (Ադրբեջանի պետական սահմանների անօրինական հատում): Նրան 5 տարվա ազատազրկում է սպառնում: Ադրբեջանի գլխավոր դատախազության դիմումի հիման վրա Ալեքսանդր Լապշինը 2016թ. դեկտեմբերի 15-ին Մինսկում ձերբակալվեց: Ադրբեջանական կողմը պահանջեց բլոգերին արտահանձնել Բաքու, իսկ Բելառուսի գլխավոր դատախազությունը հունվարի 20-ին նրան Ադրբեջանին արտահանձնելու որոշում կայացրեց: Ռուսաստանի և Իսրայելի քաղաքացի հանդիսացող Լապշինը բողոք էր ներկայացրել ընդդեմ դատախազության որոշման, բայց Բելառուսն, այնուամենայնիվ հանձնեց նրա: Ալիևի հաշվարկները, ըստ երևույթին, հեռու կգնան: Նա Լապշինին կամ կհանձնի Ռուսաստանին, կամ` Իսրայելին, որպեսզի ցույց տա աշխարհին իր «հումանիզմը» բլոգերի նկատմամբ: Սակայն այս ողջ գործընթացում ուղղակի ապշեցուցիչ էր մեր դիվանագիտության անգործությունը, կամ անկարողությունը: Հայաստանի ԱԳՆ-ն ինչո՞վ էր զբաղված այսքան ժամանակ: Բելառուսում Հայաստանի դեսպանը ի՞նչ է փորձել անել: Հասկանալի է, որ Ալիևն ու Լուկաշենկոն մտերիմ են, բայց մի՞թե Հայաստան-Բելառուս դաշինքային հարաբերությունները ՀԱՊԿ-ում ու ԵԱՏՄ-ում ոչ մի «կոպեկի» արժեք չունեն: Եթե Հայաստան-Իսրայել հարաբերությունների մակարդակը հասկանալի է, և ՀՀ իշխանություններից չէր կարելի ակնկալել, որ նրանք Իսրայելի հետ կարող էին աշխատել ու Լապշինի գործով ինչ-որ արդյունքներ արձանագրել, ապա այստեղ ուղղակի անհասկանալի է Ռուսաստանի կեցվածքը: Ինչպե՞ս կվարվեր Ռուսաստանը, եթե որևէ երրորդ երկիր ՌԴ քաղաքացուն օրինակ հանձներ ԱՄՆ-ին, կամ եվրոպական որևէ երկրին, օրինակ` Լեհաստանին: Ամբողջ օրը քարոզչական թույն կթափվեր այդ երկրների վրա: Բայց է այլ է պատկերը` Ադրբեջանի նախագահի քմահաճույքների դեպքում: Ու արդեն որերորդ անգամ... Նոր բան չէ.. Դե իսկ հարցը, թե փորձե՞լ է Հայաստանին ԱԳՆ-ն Ռուսաստանի ԱԳՆ-ի հետ այս հարցում ավելի խիստ ու կոնկրետ լինել, բնական է, որ ավելորդ է... Ամեն ինչ, առանց այն էլ պարզ է: Թամար Բագրատունի