Եթե ղեկավարը պրոֆեսիոնալ է, նա հավաքում է պրոֆեսիոնալներին.Դուրգարյան

Երեւանի Ալ. Սպենդիարյանի անվան օպերայի եւ բալետի ազգային ակադեմիական թատրոնի նախկին գլխավոր դիրիժոր եւ երաժշտական ղեկավար Կարեն Դուրգարյանի կարծիքով թատրոնի տնօրեն նշանակելու համար մրցույթ անցկացնել պետք չէ::Հայելի ակումբում հրավիրված ասուլիսում նա ասաց,որ ավելի ճիշտ կլինի, եթե ընտրությունը կատարվի միանձնյա, պետք է պաշտոնին նշանակվի դաշտի ամենապրոֆեսիոնալ գործիչը, եւ նրանից էլ պետք է հետո արդյունք պահանջել: Նա չցանկացավ գնահատական տալ՝ արդյոք Մշակույթի նախկին նախարար Հասմիկ Պողոսյանը ճի՞շտ թեկնածու է Օպերայի թատրոնի նոր ղեկավարի  պաշտոնում։ Նրա անունը նոր ղեկավարի հավակնորդների թվում էր։ «Ամբողջ աշխարհում Օպերայի թատրոնը կամ ֆիլհարմոնիկ նվագախումբը ղեկավարում է պրոֆեսիոնալ մարդ, որն ունի սուպեր գիտելիք կոնկրետ բնագավառում, ունի սուպեր կապեր աշխարհի հետ, որովհետև ամբողջ աշխարհի գեղարվեստական ղեկավարներն իրար հետ կապված են»,-ասաց նա: Օպերայի թատրոնը հատկապես վերջին շրջանում զերծ չի մնում սկանդալային երևույթներից։ Ամեն դեպքում՝ ի՞նչ պատճառ կա, որ Օպերայի նման մշակութային օջախում խմորումները չեն դադարում։ Պարոն Դուրգարյանը կարևորում է ղեկավարի դերը. «Որ կառույցն էլ վերցնեք՝ դա թիմային աշխատանք է, և եթե ղեկավարը պրոֆեսիոնալ է, նա հավաքում է պրոֆեսիոնալներին, որոնք կարողանում են գործն առաջ տանել»։ Այն հարցին, թե ինչ է մտածում, այն մասին, որ օպերայի եւ բալետի ազգային ակադեմիական թատրոնը գլխավոր դիրիժոր չունի, Դուրգարյանը հետևյալ պատասխանը տվեց. «Թատրոն չգիտեմ, որտեղ գլխավոր դիրիժոր չկա, գուցե կա ես չգիտեմ»: