Կրեմլը ներողություն է պահանջում «Պուտինը մարդասպան է» արտահայտության համար (տեսանյութ)

Ամերիկայի ձայն «Պուտինը մարդասպան է», – հենց այս բառերով ձեւակերպեց իր հարցը Միացյալ Նահանգների նախագահ Դոնալդ Թրամփի հետ հարցազրույցի ընթացքում FOX News խոշոր հեռուստաալիքի հայտնի հաղորդավար Բիլ Օ՛Ռայլին: Բառեր, որոնք Դոնալդ Թրամփը չհերքեց, բառեր, որոնք Մոսկվայի զայրույթն առաջացրեցին: Սակայն, մի պահ հետ գնանք: Ահա Բիլ Օ՛Ռայլին հարցնում է Դոնալդ Թրամփին Ռուսաստանի նախագահի վերաբերյալ, որին հետեւում է ԱՄՆ-ի նախագահի դիվանագիտական պատասխանը. «Դուք հարգո՞ւմ եք Պուտինին»: «Ես նրան հարգում եմ»: «Իսկապե՞ս: Ինչո՞ւ»: «Ես բազմաթիվ մարդկանց եմ հարգում: Դա չի նշանակում, որ ես նրա հետ լավ հարաբերություններ կունենամ: Նա իր երկրի առաջնորդն է: Լավ է Ռուսաստանի հետ լավ հարաբերություններ հաստատել, քան վատ, եւ եթե Ռուսաստանն օգնի մեզ Դաեշի, իսլամական ահաբեկչության դեմ պայքարում, լավ է: Կստացվի՞՝ գաղափար չունեմ»: «Բայց նա մարդասպան է: Պուտինը մարդասպան է»: «Շատ են, շատ մարդասպաններ կան: Իսկ ինչ է, մեր երկիրն անմե՞ղ է»: Հարցազրույցը բողոքներ է առաջացրել ինչպես Մոսկվայում, որտեղ դժգոհ են Վլադիմիր Պուտինին մարդասպան անվանելու համար, այնպես էլ Վաշինգտոնում, որտեղ Դոնալդ Թրամփի կուսակից հանրապետականներից ոմանք քննադատել են Ամերիկային Պուտինի հետ համեմատելու որոշումը: Դրանց թվում էր Նեբրասկա նահանգը ներկայացնող սենատոր Բեն Սասսեն. «Չի կարող լինել բարոյական հավասարություն աշխարհի պատմության մեջ ամենաազատասեր ազգի՝ Ամերիկայի Միացյալ Նահանգների եւ Պուտինի շուրջ հավաքված մարդասպան ավազակների միջեւ»: Ինքը՝ Վլադիմիր Պուտինը, «մարդասպան» որակմանն անձամբ չի արձագանքել եւ անցկացրել է ավանդական հանդիպումներ իր թիմի անդամների հետ: Ռուսական ԲիԲԻՍի-ն հայտնում է, որ լրագրողը չի պատրաստվում ներողություն խնդրել իր բառերի համար։ Նա նույնիսկ կատակել է, թե ներողության տեքստի վրա է աշխատում, և այն գուցե պատրաստ լինի 2023 թվականին։