Մենք է՞լ պետք է գնանք պասպորտի քսերոքս հավաքենք . Նիկոլ Փաշինյանը՝ ՀՀԿ-ին

Ազգային ժողովի օրակարգ չընդգկվեց պատգամավոր Նիկոլ Փաշինյանի հեղինակած բարձրաստիճան պաշտոնյաների և նրանց հետ փոխկապակցված անձանց եկամուտների ձևավորման աղբյուրները և գույքային վիճակն ուսումնասիրող ՀՀ ԱԺ-ի ժամանակավոր հանձնաժողով ստեղծելու մասին որոշման նախագիծը: Ձայների 39 կողմ, 56 դեմ, 1 ձեռնպահ հարաբերակցությամբ այն մերժվեց։ Մինչ քվեարկությունը,Նիկոլ Փաշինյանը՝ խոսելով իր հեղինակած օրինագծի մասին,հայտարարեց.«Քիչ հետո դուք պետք է քվեարկեք, թե արդյո՞ք ԱԺ օրակարգ պետք է ընդգրկվի բարձրաստիճան պաշտոնյաների և նրանց հետ փոխկապակցված անձանց եկամուտների ձևավորման աղբյուրները և գույքային վիճակն ուսումնասիրող ՀՀ ԱԺ-ի ժամանակավոր հանձնաժողով ստեղծելու մասին որոշման նախագիծը»: Այդ որոշումը նախատեսում է, որ ՀՀ Ազգային ժողովում ստեղծվի ժամանակավոր հանձնաժողով, որը կուսումնասիրի երբևէ ՀՀ-ում բարձրաստիճան պաշտոն զբաղեցրած, առանց բացառության, բոլոր անձանց գույքային վիճակը, նրանց եկամուտների և ունեցվածքի ձեռքբերման օրինականությունը։ «Հակափաստարկներից մեկն այն է, որ հիմա ՀՀ-ում գործում է  բարձրաստիճան պաշտոնյաների եկամուտների և գույքի  հայտարարագրման մեխանիզմ, սակայն մենք բոլորս գիտենք, որ այդ մեխանիզմը չի ներառում հանրային ծառայության մասին օրենքով նախատեսված բոլոր փոխկապակցված անձանց։ Դրանից դուրս են մնում բոլոր հարազատները, մերձավորները՝ բացի ամուսնուց և համատեղ ապրող չափահաս զավակից և ծնողից։ Այսինքն՝ մի մեծ շրջանակ դուրս է մնում։ Որևէ մեխանիզմ չկա ստուգելու՝ հայտարարագիր ներկայացրած պաշտոնյան ճի՞շտ, թե՞ սխալ տվյալներ է ներկայացնում։ Հայտարարագրերից հասկանում ենք, որ ՀՀ պաշտոնյաները հայտարարագրում են միայն այն եկամուտները, որ գտնվում են ՀՀ տարածքում, հետևաբար՝ այն գույքը, որ գտնվում է ՀՀ-ից դուրս, հայտարարագրման այս մեխանիզմից դուրս է մնում։ Այս փաստը հատուկ կարևորություն ունի այն ահազանգերի  հիման վրա, որ ամեն տարի Հայաստանից ապօրինի ճանապարհով դուրս է բերվում  մի քանի հարյուր միլիոն, միլիարդ դոլար»,- հայտարարեց Ն. Փաշինյանը։ «Հայտարարագրման մեխանիզմը փոփոխությունների և բարեփոխումների կարիք է զգում։ Այս քննարկումների փուլում ասվում է՝ «կարո՞ղ է՝ նախընտրական փուլի հետ կապ ունի այս նախագիծը»:  Եթե նույնիսկ նման մեկնաբանություն կա, նման մեկնաբանությունը բացարձակապես չի վախեցնում, որովհետև մեզ համար ընդհանրապես ընտրական և քաղաքական պրոցեսն առաջին հերթին՝ քաղաքական բովանդակության և քաղաքական մոտեցումների և մեխանիզմների  քննարկման հարթակ է, և ոչ թե, ասենք, պասպորտների քսերոքսներ հավաքելու գործընթաց։