Կարմիր գծերի տուգանքը կնվազեցնեն. Արփինե Հովհաննիսյանն ընդունում է. տուգանքը շատ է

ՀՀ ԱԺ պետական-իրավական հարցերի մշտական հանձնաժողովի նիստում  ԱԺ պատգամավորներ Էլինար Վարդանյանի, Վահե Հովհաննիսյանի եւ Ստեփան Մարգարյանի հեղինակած «Վարչական իրավախախտումների վերաբերյալ ՀՀ օրենսգրքում փոփոխություն կատարելու մասին» օրինագիծը քննարկվել է  առաջին ընթերցումով: Էլինար Վարդանյանը նշել է, որ հաշվի առնելով «Ավտոտրանսպորտային միջոցների կայանատեղերի տեղական տուրքի մասին» օրենքով սահմանված իրավախախտման եւ պատասխանատվության ակնհայտ անհամաչափությունը՝ նախագծով առաջարկվում է կայանելու մեկ ժամվա համար չվճարած 100 դրամ տուրքի համար սահմանել տուգանք նվազագույն աշխատավարձի չափով, ինչը համարժեք է ավտոկայանատեղի մեկ շաբաթվա դրույքաչափին: Գործող օրենսդրությամբ մեկ ժամվա համար սահմանված 100 դրամը չմուծելու դեպքում սահմանված է 5000 դրամ տուգանք, ինչն ավելին է քան երկու ամսվա համար նախատեսված ավտոկայանատեղի տուրքը: ՀՀ արդարադատության նախարար Արփինե Հովհաննիսյանը նշել է, որ կառավարությունն սկզբունքորեն դեմ չէ առաջարկվող գաղափարին, սակայն առարկություններ ունի սահմանված տուրքի չափի մասով: Նա առաջարկել է հիմնական զեկուցողներին համատեղ աշխատել գաղափարի շուրջ եւ համաձայնության գալ: Քննարկումների արդյունքում օրինագիծն ստացել է հանձնաժողովի դրական եզրակացությունը եւ կընդգրկվի ԱԺ նստաշրջանի օրակարգի նախագծում: