Ռուսական 200 միլիոն դոլարի վարկով մատակարարվող զինատեսակների մի մասն արդեն Հայաստանում է. Վիգեն Սարգսյան
ՀՀ պաշտպանության նախարար Վիգեն Սարգսյանն այսօր ՊՆ-ում կայացած մամուլի ասուլիսի ժամանակ անդրադարձավ նաև ՀՀ ԶՈւ-ի սպառազինությանը: Նախարարի խոսքով՝ տեղի է ունեցել տեխնիկական միջոցների համալրում, սակայն գաղտնիության և անվտանգության նկատառումներից ելնելով ցանկի մասին մանրամասներ չի կարող հաղորդել: «200 մլն-ի հետ կապված չեմ կարող բացել ցանկը, որովհետև այն հույժ գաղտնի է և ուղղակիորեն կարող եմ խախտած լինել: Բայց կարող եմ ասել, որ նրա մի մասը, ինչ նախատեսված էր 200 մլն-ով, արդեն գտնվում է Հայաստանում, արդեն մատակարարված է զինված ուժերին և դրված է ծառայության: Մնացած պայմանագրերն ընթանում են ըստ մեր կնքված ժամանակացույցերի, և մենք հետամուտ ենք լինելու՝ հնարավորինս արագ ստանալ ամբողջ ծավալները, որովհետև դա ուղիղ կապ ունի մեր մարտունակության հետ»,- ասաց Վիգեն Սարգսյանը: Ինչպես ասաց՝ արվում է ամեն բան ինչպես ռուսական շուկայում, այնպես էլ այլ գործընկեր երկրների հետ համագործակցության համար՝ համալրելու մեր զինված ուժերն անհրաժեշտ սպառազինություններով:
Հետևեք մեզ Viber-ում
