Սիմոնի մորը մխիթարել չի լինում. մանրամասներ զոհված զինծառայողի մասին

«Սիմոնը գարնանը պետք է զորացրվեր: Բոլորիս համար սա մեծ ցավ է: Գնաց երկու տարի բարով ծառայեց ու վերջում այսպես եղավ»,-Հայելի.am-ի թղթակցի հետ զրույցում ասաց Շիրակի մարզի Փանիկ համայնքի ղեկավար Հրաչիկ Սալանազարյանը: Գյուղապետը տեղեկացրեց, որ զոհված զինվորը իրենից ավագ եղբայր ունի, որն այժմ հոր հետ ՌԴ-ում է: «Եղբայրը ծառայությունն ավարտել է, հոր հետ գնացել է արտագնա աշխատանքի, էս ձմռանն էլ չէին կարողացել գալ: Տանը Սիմոնի մայրն ու տատն են հիմա: Ահավոր վիճակ է: Մխիթարել չի լինում: Մեծ հարված էր սա...»,- ասաց գյուղապետը հավելելով, որ բոլորը հարցնում են, իսկ իր խոսելը չի գալիս: Գյուղապետը նշեց, որ ընտանիքը սոցիալապես անապահով է: Սիմոնի հայրը արհեստավոր է, սակայն գյուղում աշխատանք չի գտնում: Հիշեցնենք,  որ փետրվարի 5-ի գիշերը՝ ժամը 03.55-ի սահմանում ՊԲ հարավային ուղղությամբ տեղակայված զորամասերից մեկի պահպանության տեղամասում, հակառակորդի կողմից արձակված կրակոցից մահացու հրազենային վիրավորում է ստացել ՊԲ զինծառայող, 1996թ. ծնված Սիմոն Ռաֆիկի Ճավռշյանը: Աստղիկ Ավագյան