Մի շարք խմբերի համար նոտարական որոշ ծառայություններ կմատուցվեն նվազագույն սակագնով

Ինչպես ՀՀ կառավարության այսօրվա նիստում նշեց արդարադատության նախարար Արփինե Հովհաննիսյանը՝ նոտարական որոշակի ծառայություններ նվազագույն սակագնով կմատուցվեն սոցիալական մի շարք խմբերի համար: Սահմանված վճարների նվազագույն սակագինը կգործի անապահով ընտանիքների անդամների, 1-ին և 2-րդ կարգի հաշմանդամություն ունեցող անձանց, կենսաթոշակառուների, ինչպես նաև  Հայրենական մեծ պատերազմի և Հայաստանի Հանրապետության սահմանների պաշտպանության ժամանակ մարտական գործողությունների մասնակիցների համար: Ներկայացնելով ՀՀ կառավարության 2011 թվականի մայիսի 26-ի N 733-ն որոշման մեջ փոփոխություն և լրացումներ կատարելու մասին որոշման նախագիծը՝ Արփինե Հովհաննիսյանը նշեց, որ դրա ընդունման անհրաժեշտությունը պայմանավորված է «Նոտարիատի մասին» ՀՀ օրենքում փոփոխություն և լրացումներ կատարելու մասին օրենքով, որով ընդլայնվել են նոտարական գործողությունների և ծառայությունների շրջանակը։ Այժմ նոտարը իրավասու է հավաստել կտակակատարի լիազարությունները և տալ վկայագիր, հաստատել  իրավաբանական նշանակություն ունեցող փաստերը, տալ կատարողական մակագրության թերթ: