Հայոց ցեղասպանության մասին հարցեր՝ ուղղված ԱՄՆ-ի պետքարտուղարի ու ՄԱԿ-ում դեսպանի թեկնածուներին (Տեսանյութ)

ԱՄՆ-ի Սենատի արտաքին հարաբերությունների հանձնաժողովը հունվարի 23-ին երկրի պետքարտուղարի, այսինքն՝ արտաքին գործերի նախարարի պաշտոնում ձայների 11-ը 1Օ-ի հարաբերությամբ հաստատեց նախագահ Դոնալդ Թրամփի ներկայացրած Ռեքս Թիլերսոնի թեկնածությունը։ Ի դեպ կողմ են քվեարկել հանձնաժողովի հանրապետական բոլոր սենատորները, դեմ՝ դեմոկրատ բոլոր սենատորները։ Մինչեւ հանձնաժողովում հաստատվելը, նույն հանձնաժողովում ավելի վաղ անցկացվում են լսումներ, որի ժամանակ հարցեր են ուղղում թեկնածուին։ Թիլերսոնի հարցով լսումներն անցկացվել էին հունվարի 13-ին, դեռեւս մինչեւ Թրամփի երդմնակալությունր։ Սենատորները նրան էին հղել աշխարհի տարբեր հատվածներում ԱՄՆ-ի քաղաքականության մասին հարցեր։ Սակայն ժամանակի սղության պատճառով լսումներից զատ հանձնաժողովի անդամ սենատորներին տրվում է թեկնածուին նաեւ գրավոր հարցեր հղելու հնարավորություն։ Գրավոր հարցերին թեկնածուն տալիս է գրավոր պատասխաններ։ Այս օրերին, երբ Հայոց ցեղասպանությունը հերքող ուժերը կոչ են անում նախագահ Թրամփին ու նրա աշխատակազմին երաշխավորել, որ Հայոց ցեղասպանությունը չի ճանաչվելու իր վարչակազմի կողմից, թեկնածուին գրավոր հարց հղելու հնարավորությունից օգտվել է նաեւ Նյու Ջըրզի նահանգը ներկայացնող սենատոր Ռոբերտ Մենենդեսը։ Հայոց ցեղասպանության մասին սենատոր Մենենդեսի հարցին ի պատասխան, Թիլերսոնի գրավոր պատասխանում ասված է. ՝՝1915 թվականի գազանությունները մնում են Հայաստանի ու Թուրքիայի միջեւ հարաբերություններում ցավոտ մի հարց, եւ ԱՄՆ-ի շահերից է բխում, որ ապահովենք խաղաղ ու կայուն հարաբերություններ երկու երկրների միջեւ։ Եթե իմ թեկնածությունը հաստատվի, ես կպաշտպանեմ պատմական իրադարձությունները լիովին հաշվի առնելու եւ Հայաստանի ու Թուրքիայի միջեւ տարածաշրջանային կայունության շահերից բխող երկխոսություն սկսելու կարեւորությունը՛՛, գրել է Թիլերսոնն իր գրավոր պատասխանում։ Նյութի մանրամասները կարդացեք «Ամերիկայի Ձայն»-ի  կայքում