«Հրապարակ». «Ելք»–ում հավատում են, որ Զարուհուն կկարողանան համոզել

«Չնայած նախնական պայմանավորվածությանը, որ «Ժառանգություն» կուսակցության վարչության ընդհատված նիստը պետք է շարունակվեր երկու օր հետո, այսինքն՝ շաբաթ օրը, որի ընթացքում, ի վերջո, քվեարկությամբ որոշում կընդունվեր ընտրություններին մասնակցել-չմասնակցելու, ինչ ձևաչափով մասնակցելու մասին, այդուհանդերձ, նիստը չի կայացել։ Տեղեկություններ կան, որ «Ժառանգությունում» սպասում են Ծառուկյան-Օհանյան միավորմանը, որովհետև հակառակ պարագայում չի բացառվում, որ Րաֆֆի Հովհաննիսյանի հորդորով որոշում կայացվի չմասնակցել, միայնակ մասնակցել կամ էլ «Ելք» դաշինքի մաս կազմել։ Թեպետ Արմեն Մարտիրոսյանն ակտիվ հանդիպումներ է ունենում թե Ծառուկյանի, թե Օհանյանի դաշինքի անդամների հետ և հակված է մաս կազմել «Ծառուկյան դաշինքին»։ Ինքը՝ Մարտիրոսյանը, մեզ հետ զրույցում նիստի հետաձգման մասին ասաց. «Մինչև բոլոր հարցերի պատասխանը չունենանք, նիստը չենք շարունակի»։ Թե ինչ հարցերի մասին է խոսքը, չմանրամասնեց. «Հասկանանք՝ ով ինչ մոտեցում ունի, ինչպես են իր պատկերացումները»։ Նիստի օրը նշանակված չէ, իսկ «Ժառանգությունը», Մարտիրոսյանի խոսքով, շարունակում է բանակցությունները բազմաթիվ ուժերի հետ։ Մեր տեղեկություններով, «Ելք»–ի հետ համագործակցությունը ևս դեռ փակված չէ։ Ավելին, այստեղ հավատում են, որ եթե անգամ «Ժառանգության» հետ լեզու չգտնեն, ապա Զարուհուն կկարողանան համոզել և իրենց դաշինք բերել։ Մարուքյանը մեզ հետ զրույցում նշեց, որ չնայած Զարուհի Փոստանջյանի հետ մտերիմ է, ու հաճախ են շփվում, քննարկում բազում թեմաներ, բայց այդ թեմայով քննարկում չեն ունեցել։ Իրենք բանակցում Են կուսակցության հետ»,–գրում է թերթը։ Մանրամասները՝ թերթի այսօրվա համարում։