Ապրիլյան պատերազմով պայմանավորված ընտրությունների օրը կտեղափոխվի՞

Ընդդիմադիր ՀԱԿ-ը հայտարարությամբ է հանդես եկել՝ պահանջելով 2017 թվականի ապրիլի 2-ին նշանակված խորհրդարանական ընտրությունների օրը տեղափոխել ապրիլի 21-30-ի միջակայքում։ «Հայ Ազգային Կոնգրեսը պահանջում է հարգել Ապրիլյան պատերազմի զոհերի հիշատակը, իսկ ընտրությունների օրը նշանակել գործող Սահմանադրության անցումային դրույթների 209 հոդվածով նախատեսված՝ նախկին Սահմանադրության 68 հոդվածի պահանջներին համապատասխան, այն է՝ ապրիլի 21-30-ի միջակայքում»,-ասված է հայտարարության մեջ: Hayeli.am-ը մեկնաբանություն խնդրեց ԿԸՀ մամուլի խոսնակ Հերմինե Հարությունյանից, թե արդյոք հնարավո՞ր է նշանակված ընտրությունների օրը տեղափոխել, ինչին ԿԸՀ մամուլի խոսնակը պատասխանեց․ «Ընտրությունները նշանակվում են նախագահի հրամանագրով, ուստի այն արդեն նշանակված է, եւ ԿԸՀ-ն իր աշխատանքը կատարում է»։ Զրուցեցինք նաեւ ԱԺ ՀՀԿ խմբակցության պատգամավոր, ԱԺ Պետաիրավական հարցերի մշտական հանձնաժողովի նախագահ Հովհաննես Սահակյանի հետ․ «Ապրիլյան պատերազմը մեր հերոսամարտն է, սակայն ընտրությունները կապել այդ բարոյական հարթության հարցի հետ եւ շահարկել, չեմ կարծում, որ ճիշտ է։ Մեր բոլորիս համար առաջնային տեղում է  ապրիլյան հերոսամարտը,  հետեւաբար չպետք է բարոյական հարթության խնդիրը քաղաքական շահարկման առարկա դարձնել»,-ասաց նա։ Ճշտող հարցին՝ բացառո՞ւմ եք, որ ընտրությունների օրը տեղափոխվի, պատգամավորը հարցադրումը ոչ կոռեկտ համարեց․ «Որովհետեւ ընտրությունների օրը նշանակում է նախագահը, հենվելով ընտրական օրենսգրքի  համապատասխան դրույթի վրա»։ Հարցին՝ որքանո՞վ է տրամաբանական այդ օրը նշանակել ընտրություններ, երբ հասարակության մեջ դժգոհություն կա, Սահակյանը համաձայնեց, որ կգտնվեն մարդիկ, ովքեր դա սխալ կհամարեն․ «Բայց չեմ կարծում, որ մենք պետք է հաղթական պատերազմի որեւէ մի իրավիճակ քաղաքական քննարկման առարկա դարձնենք։ Կարծում եմ այն ավելի շատ քաղաքական շահարկում եւ հնչեղություն  ապահովելու նպատակ ունի, քան բովանդակային եւ խաղում է  ազգաբնակչության զգացմունքային նյարդերի վրա»,-ասաց ՀՀԿ-ականը։ Սեդա Ղուկասյան