Цирк` վերածված Հայրենիքի

Վարչապետ Կարեն Կարապետյանը ՌԴ կառավարության ղեկավար Դմիտրի Մեդվեդևի հրավերով հունվարի 24-ին երկօրյա պաշտոնական այցով կմեկնի Ռուսաստան: Այցի շրջանակում Կարեն Կարապետյանը Մոսկվայում հանդիպում կունենա ՌԴ վարչապետ Դմիտրի Մեդվեդևի հետ: Նախատեսվում է քննարկել հայ-ռուսական համագործակցության օրակարգը: ՀՀ և ՌԴ վարչապետերը կանդրադառնան նաև Եվրասիական տնտեսական միության շրջանակում երկու երկրների ինտեգրացիոն համագործակցությանը,ինչը կնպաստի տարբեր ուղղություններով հայ-ռուսական փոխգործակցության ամրապնդմանն ու խորացմանը: ՌԴ կառավարության պաշտոնական կայքի փոխանցմամբ` հատուկ ուշադրություն է դարձվելու Եվրասիական տնտեսական միության շրջանակներում երկու երկրների համագործակցությանը: Բանակցությունների արդյունքում նախատեսվում է մի շարք միջպետական և միջկառավարական փաստաթղթերի ստորագրում: «Հայելին» հայտնել էր, որ նաև նախկին վարչապետն Հովիկ Աբրահամյանն է անսպասելի մեկնել Մոսկվա: Կարեն Կարապետյանը` իր քաղաքական ազդեցությունը մեծացնելու, ստեղծվող ռուսամետ «ընդդիմադիրների» հնարավոր հարձակումներից «պաշտպանվելու» համար` գիտի, թե ուր պետք է գնա և ինչ հարցեր լուծի... Ո՞վ գիտե` մինչև ԱԺ ընտրությունները, վստահաբար, շատերը դեռ կմեկնեն Մոսկվա` «ճշտելու» իրենց քաղաքական տեղն ու դերը Հայաստանում: Ու կապ չունի` իշխանությո՞ւն են, թե՞ ընդդիմություն, գործո՞ղ, թե՞ նախկին... Կարևորը բոլորը գիտեն` ո՞ւր պետք է գնան, ինչի՞ համար: Մինչդեռ ապրիլին կայանալիք ԱԺ ընտրությունները երկրում կառավարման մոդելի փոփոխությամբ` պետք է իսկապես ընթանային ու վերածվեին գաղափարական հենքի վրա: Չկա ներքին քաղաքական կյանքի` քաղաքական, տնտեսական, սոցիալական, իրավական ոլորտների զարգացման, ամրացման շուրջ բանավեճ, կարծիքների բախում: Ու չսպասեք, թե վաղը, կամ` մեկ-երկու շաբաթից կլինեն: Չեն լինի: Բոլորը «բազարների» մեջ են` ինչպե՞ս հայտնվել խորհրդարանում... Բոլորը զբաղված են միանալով, կապ չունի` ժամանակին միմյանց մասին ինչ են խոսել, ինչպես վերաբերել, բոլորին միավորել է խորհրդարանում հայտնվելու ձգտումը: Չկա Հայաստանի արտաքին քաղաքական ուղղության, բացթողումների, նպատակների մասին կարծիքների բախում: Ամեն ինչ լա՞վ է, գո՞հ են բոլորը Հայաստանի վարկանիշից, Ռուսաստանի կողմից Ադրբեջանին վաճառված ու դեռ վաճառվելիք սպառազինության պայմանագրերից: Գո՞հ են մեկուսացած և ԵԱՏՄ-ում անորոշության ու պարտքերի մեջ խեղդված Հայաստանից: Արտաքին քաղաքականության հարցում` միակ բացառությունը «Ազատ դեմոկրատներն» են, որոնք ի սկզբանե շատ կոնկրետ գծել են սահմանները` Հայաստանի ապագան ԵՏՄ-ում չի կարող լինել զարգացման ուղի ապահովել և Հայաստանը պետք է Ռուսաստանի հետ վերանայի հարաբերությունները: Մնացած ողջ քաղաքական դաշտը գերադասում է չխոսել Ռուսաստանի ազդեցության տակ խեղդվող Հայաստանի հիմնական խնդրի մասին: Ռուսաստանի հետ «խոսելու» այլ թեմա կա` ինչպե՞ս Կրեմլ կամ Կրեմլի միջանցքներին մոտ հասնել ու լուծել խորհրդարանում հայտնվելու խնդիրը: Հետո զարմանում ենք, թե ինչո՞ւ Հայաստանն ինքնուրույն պետություն չէ: Ի՞նչ ինքնուրույնություն, երբ ողջ քաղաքական դաշտը` ընդդիմությունից մինչև իշխանություն` Մոսկվայից «դաբրո» բերելով է զբաղված: Նման «մուրացկան» քաղաքական դաշտին ո՞վ հարգանքով կվերաբերվի Մոսկվայում, Բրյուսելում ու Վաշինգտոնում... Հարցը` հռետորական էր: Ապրիլին կայանալիք խորհրդարանական ընտրությունները Հայաստանի ապագան փրկելու համար լուծումների ու ուղիների ներկայացման իրական պայքար պետք է դառնային, բայց այդ ընտրությունները վերածվեցին ռուսական, վատ բեմադրված, անհաջող կրկեսի: Թամար Բագրատունի