Սիրիացի փախստականների թիվը Թուրքիայի սահմանին կրկնակի մեծացել է

Սիրիացի փախստականների թիվը, ովքեր փորձում են հատել Թուրքիայի սահմանը, երկու անգամ մեծացել է Սիրիայի հյուսիսում ռազմական գործողությունների ակտիվացմանը զուգահեռ։ Այս մասին հաղորդում է «BBC»-ն՝ հղում անելով Թուրքիայի պաշտոնատար անձանց։ Ինչպես նշում է Կիլիս քաղաքի քաղաքապետը, սահմանին կուտակվել են մոտ 35 հազար փախստականներ այն դեպքում, երբ նախօրեին նրանց թիվը չէր գերազանցում 20 հազարը։ Սահմանային ծառայությունները չեն թողնում նրանց Թուրքիա մտնել։ ԵՄ-ը կոչ է արել Թուրքիային ներս թողնել բոլոր սիրիացի փախստականներին։ «Կասկածի ենթակա չէ այն, որ Սիրիայից ժամանած մարդիկ փախստականներ են՝ սիրիացիներ, ովքեր միջազգային աջակցության կարիքն ունեն»,- նշել է եվրոպական դիվանագիտության ղեկավար Ֆեդերիկա Մոգերինին։ Նա հավելել է, որ ԵՄ-ը հենց նրա համար է օգնում Թուրքիային, որպեսզի վերջինս ընդունի և ապաստանով ապահովի բոլոր փախստականներին։