Խանումյանի ծեծի գործով բողոքները մերժվել են․ պաշտպանը կդիմի ՄԻԵԴ

ԼՂՀ Ազգային ժողովի ընդդիմադիր պատգամավոր, «Ազգային վերածնունդ» կուսակցության նախագահ Հայկ Խանումյանին ծեծի ենթարկելու դեպքով պաշտպանի ներկայացրած բողոքները մերժվել են։ Այս մասին Hayeli.am-ի հետ զրույցում ասաց Ալումյանի պաշտպան Հայկ Ալումյանը։ «Հինգ տարբեր բողոք ունենք, որոնք տարբեր փուլերում են․Վերաքննիչ քրեական դատարանի կողմից երեք բողոքները մերժվել են, դրանք դեռ կբողոքարկենք Վճռաբեկ դատարանում։ Նաեւ ստացել ենք իրենց Գերագույն դատարանից մի որոշում, որով Վճռաբեկ դատարան ներկայացրած մեր մյուս դիմումը եւս մերժվել է»,-ասաց Հայկ Ալումյանը։ Պաշտպանը վստահեցրեց՝ Վերաքննիչի մերժած բողոքները կբողոքարկեն Վճռաբեկ դատարանում, ապա ըստ ընթացակարգի, մինչեւ ՄԻԵԴ: «Այնպես չէ որ կարողանան օրը ցերեկով մարդուն առեւանգեն, տանեն ծեծեն  ու որոշեն, որ ծեծողները չպիտի պատժվեն․ ՄԻԵԴ-ը  հենց  նման մարդկանց համար է ստեղծվել»,-ասաց նա։ Հիշեցնենք, որ Ալումյանը ծեծի էր ենթարկվել հունիսի 6-ին Ստեփանակերտի կենտրոնում: ԼՂՀ ԱԺ շենքից դուրս գալիս իրեն էին մոտեցել 7-8 զինվորական համազգեստով անձինք, ծեծելով նստեցրել մեքենան, Ստեփանակերտի հարեւանությամբ գտնվող գյուղում էլ ծեծել: Դեպքի առթիվ հարուցված քրգործը սակայն, կարճվել է, իսկ գործով կալանավորված չորս անձինք համաներմամբ ազատ արձակվել: Սեդա Ղուկասյան