«Ժառանգությունում» համաձայնության չեկան

Ընդհատվել է  շուրջ երեքուկես ժամ տևած «Ժառանգություն» կուսակցության վարչության նիստը: Կուսակցության նախագահ Րաֆֆի Հովհաննիսյանը հայտարարել է, որ առաջիկա երկու օրվա ընթացքում նիստը կշարունակվի: Արդեն տեղեկացրել ենք,որ այսօր կեսօրից հետո մեկնարկել էր «Ժառանգություն» կուսակցության վարչության նիստը:Մասնակցում էին կուսակցության ստորաբաժանումների ներկայացուցիչներ: Զարուհի Փոստանջյանը նշեց, որ ինքը մնացել է իր տեսակետին եւ ընտրություններին միայնակ գնալու կողմնակից է:«Ես անձամբ կողմ եմ, որ մենք գնանք մեր ցուցակով, առանձին»,-ասաց Փոստանջյանը՝ նշելով, որ կուսակցությունում ինքը համակիրներ ունի: Հարցին, թե հնարավո՞ր է, որ ընդհանուր համաձայնության չգալու դեպքում «Ժառանգությունն» առհասարակ չմասնակցի ընտրություններին, Փոստանջյանն ասաց, որ դա չի բացառվում: Միաժամանակ վերջինս նշեց, որ ինքը դուրս չի գա կուսակցությունից, եթե մեծամասնության քվեարկությամբ որոշվի ընտրություններին Սեյրան Օհանյան- Վարդան Օսկանյան դաշինքով մասնակցել: Հարցին, հնարավոր է տարաձայնությունների ընթացքում լքի կուսակցությունը, նշեց՝  ոչ։ Կուսակցության վարչության անդամ Սուսաննա Մուրադյանը տեղեկացրեց, որ վարչության անդամները երեք-չորս անգամ հանդես են եկել ելույթներով, փորձել մեկը մյուսին համոզել: Սակայն նիստը ընդհատվել է, և որոշում այդպես էլ չի կայացվել: Սոնա Դավթյան