Գուրգեն Արսենյանի որդին դատապարտվեց

ՀՀ ԱԺ պատգամավոր Գուրգեն Արսենյանի որդին՝ Գուրգեն Արսենյանը, Երևանի Կենտրոն և Նորք-Մարաշ վարչական շրջանների ընդհանուր իրավասության դատարանի դատավճռով մեղավոր ճանաչվեց ՀՀ քրեական օրենսգրքի 258 -րդ հոդվածի 4-րդ մասով և դատապարտվեց 4 տարի ժամկետով ազատազրկման:Դատարանի վճռով Արմեն Ներսիսյանն ու Գուրգեն Արսենյանը մեղավոր ճանաչվեցին խուլիգանություն կատարելու համար: Հիշեցնենք, որ համաձայն մեղադրական եզրակացության՝ Գուրգեն Արսենյանն իր ընկերներ Արմեն Ներսիսյանի, Գուրգեն Գրիգորյանի և գործով ինքնությունը չպարզված այլ անձանց հետ 2016թ. ապրիլի 17-ին Երևան քաղաքի Աբովյան փողոցում գործող «Կրիստալ» գիշերային ակումբի դիմաց, կոպիտ կերպով խախտելով հասարակական կարգն ու բացահայտ անհարգալից վերաբերմունք դրսևորելով հասարակության նկատմամբ, խմբի կազմում, որպես զենք օգտագործվող առարկայի գործադրմամբ, կատարել է խուլիգանություն: Արմեն Ներսիսյանին էլ մեղադրանք է առաջադրվել այն բանի համար, որ նա 2015թ. հունիսի 21-ին իր ընկեր Գուրգեն Արսենյանի և վերջինիս 3 այլ` գործով ինքնությունները չպարզված ընկերների հետ գտնվել է Երևան քաղաքի Թամանյան փողոցում գտնվող «Հեմինգուեյ» ակումբում, որտեղ գինովցած լինելու պատճառով աղմկել է, ինչի պատճառով նրան դիտողություն է արել նշված ակումբի տնօրեն Գևորգ Պողոսյանը: Իսկ ամբաստանյալ Գուրգեն Գրիգորյանը, ով մեղադրվում էր ՀՀ քրեական օրենսգրքի 258-րդ հոդվածի 3-րդ մասի 1-ին կետով, դատապարտվեց 8 ամիս ժամկետով ազատազրկման: Գրիգորյանը 7 ամսից ավել է կալանքի տակ է, հետեւաբար մոտ ժամանակներս ազատության մեջ կհայտնվի։