Ծառուկյան-ԲՀԿ հանդիպումն ավարտվեց. ԲՀԿ առաջնորդը՝ Գագիկ Ծառուկյանն է. Armtimes.com
ԱԺ պատգամավոր Գագիկ Ծառուկյանի եւ ԲՀԿ-ականների պաշտոնական առաջին հանդիպումն ավարտվել է: Այն կայացել է Գագիկ Ծառուկյանին պատկանող «Երեւանի գինու, օղու կոմբինատ»-ի շենքում գտնվող գրասենյակում: Հանդիպման վերաբերյալ հարցազրույց ԱԺ «Բարգավաճ Հայաստան» խմբակցության պատգամավոր Լյովա Խաչատրյանի հետ: - Պարոն Խաչատրյան, արդեն ավարտվե՞լ է հանդիպումը, ի՞նչ հարցեր եք քննարկել: -Տարածքային կառույցների կազմակերպչական հարցեր: - Հանդիպմանը ներկա են եղել միայն ԲՀԿ քաղխորհրդի անդամնե՞րը: - Եղել են տարածքային կառույցների ղեկավարներն ու կուսակցական պատգամավորները: - Այլ քաղաքական ուժերից ներկայացուցիչ չի՞ եղել: - Ոչ, սա առաջին հանդիպումն էր: - Որտե՞ղ եք հանդիպել՝ ԲՀԿ նախկին գրասենյակո՞ւմ, թե՞ նոր գրասենյակում: - Կուսակցության նախկին գրասենյակում: - Դաշինքների հետ կապված հարցեր քննարկե՞լ եք, ո՞ւմ հետ եք համագործակցելու, Ծառուկյանն ի՞նչ ասեց: - Պարոն Ծառուկյանն ասեց, որ բաց ենք բոլորի համար: - Լիազորվա՞ծ են արդեն մարդիկ, որոնք պետք է բանակցություններ վարեն: - Նման հարց չի քննարկվել՝ լիազոր լինել ու չլինելու: Ասեց, որ բաց ենք բոլորի հետ համագործակցելու: - Կա՞ քաղաքական ուժ, որի հետ ԲՀԿ-ն չի համագործակցի: - Նման հարց չի բարձրաձայնվել: - Գագիկ Ծառուկյանը ԲՀԿ ղեկավարի պարտականությունները ստանձնե՞լ է, այս հարցը ո՞նց է կարգավորվում: - Ի՞նչ է նշանակում կուսակցության ղեկավարի պաշտոնը ստանձնել: -Հիմա կուսակցությունը Նաիրա Զոհրաբյա՞նն է ղեկավարում, թե՞ Գագիկ Ծառուկյանը: - Կուսակցության ղեկավարն այսօր Նաիրա Զոհրաբյանն է, կուսակցության առաջնորդը միշտ եղել ու մնացել է Գագիկ Ծառուկյանը: - Այս հանդիպումներն ի՞նչ պարբերականություն են ունենալու: - Մեր հանդիպումներն այս ձեւաչափով օրվա ցանկացած ժամի, ցանկացած անձի համար բաց է: - Պաշտպանության նախկին նախարար Սեյրան Օհանյանի հետ համագործակցության հարց քննարկվե՞լ է այսօր: - Նման խնդիր չի քննարկվել, անվանական համագործակցության հետ կապված խնդիր չի քննարկվել: Սա կարծում եմ՝ պարոն Ծառուկյանի խնդիրն է՝ մոտ ժամանակներս պարզ կլինի: - Այսինքն՝ պարոն Ծառաուկյանն անձա՞մբ կբանակցի: - Ես չգիտեմ՝ ով կբանակցի, բայց նման խնդիր այսօր չի քննարկվել, պարզապես, բարձրաձայնվել է, որ բաց ենք յուրաքանչյուր քաղաքական ուժի համար, որը ցանկություն կունենա միանալու մեր ծրագրերին: - Բացառություն չկա՞: - Բացառության մասին խոսք չի գնացել: - Ռեյտինգային թեկնածուների առաջադրումների մասով քննարկում ունեցե՞լ եք: - Այո, մենք արդեն սկսում ենք ցուցակների կազմումը: Տարածքային կառույցները սկսում են ռեյտինգային ցուցակներում թեկնածուների առաջադրումները ներկայացնել կուսակցության գրասենյակ: - Պարոն Ծառուկյանը լինելո՞ւ է ռեյտինգային ցուցակում, օրինակ՝ Աբովյան քաղաքն ընդգրկող ընտրատարածքում: - Նման հարց չի քննարկվել: -Իսկ դուք լինելո՞ւ եք ռեյտինգային ցուցակում: - Եթե կուսակցությունը դեմ չլինի, այո, լինելու եմ: - Համամասնական ցուցակի կազմման հարց քննարկե՞լ եք, Գագիկ Ծառուկյա՞նն է գլխավորելու ցուցակը: -Նման հարց չի քննարկվել:
Հետևեք մեզ Viber-ում
