«Պլանավորված քաղաքական բեմադրություն»․ քաղաքական մեկնաբանը՝ Գագիկ Ծառուկյանի վերադարձի մասին
Քաղաքական մեկնաբան Անուշ Սեդրակյանն այն համոզմունքին է, որ Գագիկ Ծառուկյանի վերադարձը մեծ քաղաքականություն նախապես ծրագրված է եղել իշխող ուժի կողմից․«Քաղաքական դաշտն այժմ նմանվում է շախմատային տախտակի, եւ այն շատ բնական է․ մի ձեռք է շարժում է բոլոր քարերը, հետաքրքիրն այն է, որ միայն հետո կիմանանք, թե այդ քարերից որ մեկն է թագուհին, որը թագավորը եւ որն ընդամենը այպես կոչված պեշկա»,-Hayeli.am-ի հետ զրույցում ասաց Անուշ Սեդրակյանը՝ անդրադառնալով Գագիկ Ծառուկյանի հայտարարությանը։ Հիշեցնենք, որ քիչ առաջ ԲՀԿ հիմնադիր, ԱԺ պատգամավոր Գագիկ Ծառուկյանը հայտարարությամբ հանդես եկավ՝ ասելով, որ բացում է քաղաքականության ծալած էջը եւ մասնակցելու է սպասվող խորհրդարանական ընտրություններին։ «Երեւի այդ առումով քաղաքական գործընթացը դառնում է անհետաքրքիր, քանի որ քաղաքական մեխանիզմով շարժվող քաղաքական գործընթաց չէ, այլ շատ լավ պլանավորված քաղաքական բեմադրություն, եւ այդ քաղաքական բեմադրության կոնտեքստում էլ կարելի է մեկնաբանել այդ վերադարձը»,-ասաց մեր զրուցակիցը։ Մեր դիտարկմանը, թե ո՞վ է այդ ձեռքը, արդյոք իշխող ուժի մասին է խոսքը, Սեդրակյանը պատասխանեց․ «Ինձ թվում է՝ բոլորն էլ գիտեն, որ ՀՀ-ի քաղաքական դաշտը սեփական լռելյայն համաձայնությամբ վերածվել է քաղաքական առեւտրի եւ պայմանավորվածությունների դաշտի, իսկ քաղաքականությունը որպես կանոն նորմալ զարգացած երկրներում գաղափարների եւ ծրագրերի պայքարն է եւ հաշվետվությունը հանրության առջեւ։ ՀՀ-ում մոտ 25 տարի այդ գործընթացը չկա, դրա համար խոսել բառիս բուն, մասնագիտական իմաստով, ժամանակավրեպ է»։ Ճշտող հարցին՝ Գագիկ Ծառուկյանը կարո՞ղ է խաղաքարտերը խառնել, Սեդրակյանն ասաց․«Եթե մարդը ՀՀ-ում մտնում է քաղաքական դաշտ, նա մտնում է իբրեւ խաղաքարտ, այլ ոչ թե խաղաքարտ խառնող»։ Հիշեցնենք, որ Անուշ Սեդրակյանը Ազատ Դեմոկրատներ կուսկացության փոխնախագահն էր, սակայն տարեվերջին կուսակցությունից դուրս գալու դիմում ներկայացրեց։ Մեր հարցին՝ որեւէ կերպ իր մասնակցությունը ընտրություններում հնարավո՞ր է, վերջինս ասաց․ « Խորհրդարանական ընտրություններում իմ մասնակցությունը պայմանավորված կլինի միայն ֆորսմաժորային իրավիճակներով, ներկա քաղաքական կոնյուկտուրային ես չեմ մասնակցում»։ Սեդա Ղուկասյան
Հետևեք մեզ Viber-ում
