Ծառուկյանն ու Սեյրան Օհանյանի ղեկավարած դաշինքի առաջնորդները հանդիպել են

Մի քանի օր առաջ հանդիպել են Գագիկ Ծառուկյանն ու այսօր հայտնի դարձած ընդդիմադիր դաշինքը կազմող ուժերի ղեկավարները՝ Պաշտպանության նախկին նախարար Սեյրան Օհանյանը, Համախմբում կուսակցության նախագահ Վարդան Օսկանյանը, Վիկտոր Դալլաքյանը՝ Երրորդ հանրապետություն կուսակցության նախագահ եւ դեմոկրատական կուսակցության առաջնորդ Արամ Գասպարի Սարգսյանը: Քննարկել են ընտրություններին համատեղ մասնակցության հարցը, ընդ որում  Օհանյան-Դալլաքյան-Օսկանյան-Սարգսյան կողմը ցանկացած պայմանով դաշինք կազմելու շահագրգռվածություն է ցուցաբերել: Չի բացառվում, որ առաջիկայում նման համագործակցություն առաջ գա: Հիշեցնենք, որ այսօր «Համախմբում» կուսակցությունը, «Երրորդ հանրապետություն» կուսակցությունը, Հայաստանի դեմոկրատական կուսակցությունը համագործակցության համաձայնագիր են հրապարակել, որում նշվում է,- Սթափ գնահատելով Հայաստանի ու Լեռնային Ղարաբաղի առաջ ծառացած մարտահրավերները, որոնք սպառնում են մեր անվտանգությանը, արձանագրելով, որ մեզանում առկա համատարած կոռուպցիան, տնտեսաքաղաքական մենատիրությունը և պետական կառավարման արդյունավետության ցածր մակարդակը մեր պետության հետընթացի, արտագաղթի, մարդկանց կյանքի ցածր որակի հիմնական պատճառներն են,համոզված լինելով, որ հասարակական–քաղաքական ու սոցիալ–տնտեսական ոլորտներում համակարգային փոփոխությունների հասնելը քաղաքական օրակարգի թիվ մեկ հարցն է,գիտակցելով յուրաքանչյուրիս անհատական և հավաքական պատասխանատվությունն ու իրավիճակի ողջ լրջությունը, կաշկանդված չլինելով կուսակցական–հատվածական շահերով,մի կողմ դնելով առանձին հարցերի լուծման շուրջ պատկերացումների առանձնահատկությունները և առաջնորդվելով միասնաբար գործելու հանրային պահանջով,ունենալով մեր երկիրն այս վիճակից դուրս բերելու հստակ պատկերացումներ և իրականացվելիք քայլերի հստակ ժամանակացույց, հաշվի առնելով առաջիկա խորհրդարանական ընտրությունների գերկարևորությունը, ընդունելով, որ Հայաստանում նոր որակի իշխանության ձևավորումը հանրության ճնշող մեծամասնության պահանջն է, և այդ պահանջը հնարավոր է իրականացնել հասարակական–քաղաքական լայն համախմբման միջոցով՝հայտարարում ենք մեր ընդհանուր մոտեցումների և համատեղ աշխատելու պատրաստակամության մասին՝ Ազգային ժողովի ընտրությունների ժամանակ ակնկալելով ժողովրդի վստահության քվեն:Մենք՝ «Համախմբում» կուսակցությունը, «Երրորդ հանրապետություն» կուսակցությունը, Հայաստանի դեմոկրատական կուսակցությունը, առաջիկա խորհրդարանական ընտրություններին մասնակցելու ենք դաշինքով։ Դաշինքը բաց է և պատրաստ է համագործակցել քաղաքական այն ուժերի և միավորումների, հասարակական կառույցների ու անհատների հետ, ովքեր կիսում են մեր մտահոգությունները և տեսակետները։