«Մենք քեզ հետ ենք, Գարո՛». Սերժ Թանկյանն աջակցում է Մեջլիսի հայ պատգամավորին

Աշխարհահռչակ «System of a Down» ռոք խմբի երգիչ, հասարակական գործիչ Սերժ Թանկյանը հանդես է եկել ի պաշտպանություն Թուրքիայի խորհրդարանի հայազգի պատգամավոր Գարո Փայլանի: «Գարո Փայլանն իրական հերոս է, քանի որ շատ վտանգավոր է ճշմարտության մասին խոսել մի հասարակությունում, որը կարող է բազմաթիվ պատասխան հարվածներ հասցնել: Ես նախորդ տարի նրան հանդիպելու պատիվ եմ ունեցել: Մենք քեզ հետ ենք, Գարո՛»,- իր ֆեյսբուքյան էջում գրել է Թանկյանը: Գարո Փայլանը հունվարի 13­-ին՝ սահմանադրական փոփոխությունների առաջարկի քննարկման ժամանակ «ցեղասպանություն» եզրույթը կիրառելու պատճառով իշխող «Արդարություն և զարգացում» և ընդդիմադիր «Ազգայնական շարժում» կուսակցությունների կողմից խիստ արձագանքի էր հանդիպել: Նրանից պահանջել էին հրաժարվել «ցեղասպանություն» բառից: Այն բանից հետո, ինչ Փայլանը հրաժարվել էր դա անել, նրան 3 նիստից հեռացնելու մասին որոշում էր կայացվել, իսկ նրա խոսքերը հանվել էին Մեջլիսի արձանագրություններից: Հայ պատգամավորն այդ հարցով դիմել է Սահմանադրական դատարան: