Վահե Ավետյանը մեկնելու է Երևան... սպառնում է որոշ մարդկանց այն աշխարհ ուղարկել

haqqin.az կայքը տարածել է իրեն «Վտարանդի գրողների միության» համահիմնադիր համարող  Վահե Ավետյանի հայտարարությունը :Վերոնշյալ բարբաջանքում վերջինս ադրբեջանական լրատվամիջոցներին կոչ է արել Ադրբեջանում հավատարմագրված դիվանագիտական ներկայացուցչությունների ուշադրությունը հրավիրել հայկական լրատվամիջոցներում ու սոցիալական ցանցերում իր հասցեին հնչող սպառնալից հայտարարությունների փաստի վրա: Ավետյանի խոսքով ինքն իբր 25 տարի հալածվել է իր ստեղծագործությունների և քաղաքական դիրքորոշման համար: Նա նշել է, թե հազարից ավելի նամակ է ստացել, որոնց հեղինակները հայհոյում են իր հանգուցյալ ծնողներին, ընտանիքին ու ազգականներին, սպառնում են բռնաբարել եւ սպանել իր 4-ամյա դստերը: Ավետյանը բողոքել է, թե չնայած այս սպառնալիքներին՝ հայաստանյան ոչ մի լրատվամիջոց կամ իրավապաշտպան կազմակերպություն չի փորձել, ինչպես նա է բնորոշում, «կարգի հրավիրել կատաղած շներին»: Նա մատնաշել է, թե արդեն երկու շաբաթ է «Առավոտ»-ում, «Հայոց աշխարհ»-ում, 1in.am-ում, «Վան» ռադիոկայանով եւ մի շարք այլ լրատվամիջոցներով բաց տեքստով կոչ են անում սպանել իրեն: Նա հայտնել է, թե գարնանը ծրագրում է այցելել Հայաստան: Իբրև թե այդ պատճառով է նա որոշել դիմել ադրբեջանական լրատվամիջոցներին: «Իմ երկրում չկա ազատ լրագրություն :Դիմում եմ հայաստանյան ոստիկանությանը, իշխանությունը զավթած խունտային, ժուռնիտուտկաներին եւ մարդու իրավունքների կիսապաշտպաններին, որոնք ապրում են ժողովրդավարական երկրների դրամաշնորհների հաշվին եւ պահանջում եմ կասեցնել իմ դեմ կազմակերպված արշավը: Եթե իմ նկատմամբ ինչ-որ ֆիզիկական հարձակում իրականացվի, ես վստահ չեմ, որ նրանցից մի քանիսը չեն հայտնվի այն աշխարհում: Նախապես զգուշացնում եմ, որ իմ վրայից հանում եմ պատասխանատվությունը»,- նշել է Ավետյանը: