«Սեյրան Օհանյանը համաձայն չէր մարտի 1-ի հետ, հոկտեմբերի 27-ի հետ». Ա. Արշակյան

«Միացյալ հայեր» նախաձեռնությունը որոշում է կայացրել 2017 թվականի խորհրդարանական ընտրություններում աջակցել ՀՀ պաշտպանության նախկին նախարար Սեյրան Օհանյանին և նրա շուրջ համախմբված դաշինքին։Նախաձեռնության անդամ ԳԽ նախկին պատգամավոր Ազատ Արշակյանը խոսելով առաջիկա ընտրությունների և պաշտպանության նախկին նախարար Սեյրան Օհանյանի՝ քաղաքական հայտ ներկայացնելու մասին, նշեց. «Քանի դեռ նա զինվորական է, նա ենթարկվում է համակարգին: Բայց, կարծում եմ՝ նրա դուրս գալը հենց դա է նշանակում, որ նա համաձայն չէր մարտի 1-ի հետ, հոկտեմբերի 27-ի հետ: Նա ազնվորեն ասել է՝ դուրս եմ գալիս, որովհետև համաձայն չեմ ձեզ հետ»: Լրագրողներից մեկի հարցին էլ, թե՝ Դուք իսկապե՞ս ունեք տեղեկատվություն, որ Սեյրան Օհանյանը հեռացել է և ոչ թե հեռացվել՝ Ա. Արշակյանն այսպես պատասխանեց. «Պաշտոնանակությունը պետք է պատճառաբանվի, բանակային պաշտոնանկությունները սովորաբար հրապարակային չեն լինում։ Սեյրան Օհանյանի պաշտոնանկության պատճառը մեզանից ոչ ոք չգիտի, բայց փաստն այն է, որ նա չի համապատասխանել այսօրվա իշխանության կամ ռեժիմի պահանջներին, ինչն ինձ բավարարում է։ Սեյրան Օհանյանին ոչ թե հեռացրել են, այլ ավելի բարձր պաշտոն են առաջարկել, բայց նա համակարգից է դուրս եկել»։ Արցախյան պատերազմի վետերան Արթուր Ալեքսանյանն էլ նշեց, որ իրենք ամեն ինչով աջակցելու են Ս. Օհանյանին, քարոզչություն են տանելու նրա ծրագրերը, նպատակներն իրականացնելու ուղղությամբ։ «Ինչով կարողանանք՝ կօգնենք։ Ինչ ֆորմատով էլ ինքը գնա, մենք այդ ֆորմատին էլ աջակցելու ենք։ Մեր այս հայտարարությունից հետո լրագրողներն անընդհատ հարձակվում են մեզ վրա։ Ստացվում է՝ մենք անընդհատ պաշտպանվում ենք։ Այնպիսի հարցազրույց չի եղել, որ Սեյրան Օհանյանի մասով չհարձակվեն մեզ վրա։ Ինչ եղել, եղել է, առաջ նայենք»,- ասաց նա: Սոնա Դավթյան