«Գեղամ Խաչատրյանին պետք է նստեցնել ամբաստանյալի աթոռին». Գևորգ Սաֆարյան

Այսօր Կենտրոն և Նորք Մարաշ վարչական շրջանների ընդհանուր իրավասության դատարանում ակտիվիստ Գևորգ Սաֆարյանը հանդես եկավ ավարտական ճառով:Վերջինը մինչ ճառը սկսելն՝ անդրադարձել է դատախազի այն հայտարարությանը, որ պաշտպանական կողմի ցուցմունքները պետք է անարժանահավատ համարել. ցուցումներ են տվել, որ պաշտպանեն իրենց ընկերոջը: Այնուհետև Գևորգ Սաֆարյանը հանդես եկավ ճառով և վերջին խոսքով՝ նշելով, որ մեր դատաիրավական համակարգը հասել է աբսուրդի և ցանկացած մարդու կարող են դատել։ Իսկ այնուհետև նշեց, որ 2015-ի դեկտեմբերի 31-ին իրադարձություններն այնպես չեն եղել, ինչպես ներկայացնում է դատախազությունը։ Միջոցառման մասնակիցները ցանկացել են Չեբուրաշկայի գլխարկով մտնել Ազատության հրապարակ, ինչը նրանց չի թույլատրվել, այնուհետև Ձմեռ պապիկը փորձել է եղևնին ձեռքին մտնել Ազատության հրապարակ, որից հետո էլ ստիպված տոնածառի հանդերձանք են հագցրել քաղաքացի Հովհաննես Ղազարյանին։ «Գլուխն ավելի կարծր է, եթե այդ հարվածի ընթացքում Գեղամ Խաչատրյանի մաշկը պատռվել էր, աչքն` ուռել, գոնե որևէ հարված պետք է մնար իմ ձեռքի վրա։ Ինչ ուժով եմ ես հարվածել նրա գլխին, նույն ուժով նրա գլուխն է հարվածել իմ ձեռքին, ֆիզիկայի օրենք է, բայց ոչ ձեռքս է ուռել, ոչ այտուցվել է։ Այս բոլոր փաստերն ապացուցում են, որ բազմաթիվ հոդվածներով Գեղամ Խաչատրյանին պետք է նստեցնել ամբաստանյալի աթոռին»,- ասաց նա: Հիշեցնենք, որ Գևորգ Սաֆարյանը մեղադրվում է 2015-ի դեկտեմբերի 31-ին տոնածառ տեղադրելու փորձի ժամանակ ոստիկան Գեղամ Խաչատրյանին հարվածելու մեջ։