«Արամ Ա-ի այցը Սիրիա դիվանագիտական մեծ սխալ էր». Գևորգ Յազըճյան

«Արամ Ա կաթողիկոսի հանդիպումը Սիրիայի նախագահ Բաշար Ասադի հետ խախտում է հայկական կողմի չեզոքությունը սիրիական պատերազմի վերաբերյալ: Կաթողիկոսի այցը Սիրիա և այնտեղ տեղի ունեցած հանդիպումները վրդովմունք են առաջացրել սուննի արաբների շրջանում,որոնք  կարծում են, որ սիրիահայերը Ասադի վարչակազմի կողմից են: Լավ կլիներ դրական չեզոքությունը պահպանել: Դամասկոսի թեմի առաջնորդը նույնիսկ տեղյակ չի եղել Արամ Ա-ի այցի մասին, ԶԼՄ-ներից է իմացել: Կարելի էր համբերել, տեսնել, թե իրադարձությունները ուր են տանելու: Մանավանդ որ պատերազմը դեռ ավարտված չէ: Այս շտապողականությունն իզուր էր, դիվանագիտական մեծ սխալ»,-Հայելի ակումբում լրագրողների հետ հանդիպմանն ասաց   պատմաբան Գևորգ Յազըճյանը: «Հալեպահայերը տնտեսական ահավոր վիճակում են, նրանց համար համահայկական լուծում պետք է գտնվի: Շատ տեղերում հայկական կառույցները վնասվել են, քանդվել, ամբողջովին վերակառուցման կարիք ունեն: Հայկական թաղամասերից դուրս հայերին պատկանող գործարանները, խանութները վաղուց արդեն թալանված են: Պետք է լուծում տրվի այս խնդրին, բայց, նախ և առաջ, պետք է հասկանալ՝ մենք ուզու՞մ ենք պահպանել հայկական գաղութը Սիրիայում, թե ոչ»,հավելեց պատմաբանը: «Թեև տարեվերջին արևելյան Հալեպի հարցը ռազմական լուծում գտավ, սակայն դա չի նշանակում, որ պատերազմն ավարտված է :Աստանայում շուտով բանակցություններ են սկսելու, այնտեղ տարբեր խաղացողներ կան, որոնցից մեկին՝ քրդերին, Թուրքիայի պահանջով արդեն հասցրել են դուրս դնել բանակցությունների սեղանից: Սակայն այսօր անհնար է Սիրիայում քրդական գործոնն արհամարհել, որովհետև նրանք գետնի վրա ուժ ունեն», - հայտարարեց պատմաբանը: