Աղմկոտ վերնագրեր են. Վիգեն Սարգսյանը մեկնաբանում է

«Հարցերը, որոնք հնչում են այս օրերին, շատ հստակ պատասխաններ արդեն ունեն: Ինչ վերաբերում է ապագա վարչապետի խնդրին, ապա երկրի ղեկավարը ՀՀԿ համագումարի ժամանակ շատ հստակ հնչեցրեց, որ ընտրություններում հաջողության դեպքում մեր ապագա վարչապետը Կարեն Կարապետյանն է: Անկախ նրանից, թե ինչպիսին կլինի ցուցակը, որը հրապարակվելու է կուսակցության խորհրդում և գործադիր մարմնում քննարկվելուց հետո, մեր քաղաքական ուժի առաջնորդը երկրի նախագահ Սերժ Սարգսյանն է, և նրանք, ովքեր փորձում են նոր վարկածներ առաջ քաշել, կարծում եմ՝ լսարանի հետևից ընկնելով են դա անում», - Հանրային հեռուստաընկերության «Օրակարգից դուրս» հաղորդման եթերում  ՀՀ Պաշտպանության նախարար Վիգեն Սարգսյանը մեկնաբանել է 2017 թ. խորհրդարանական ընտրություններին ՀՀԿ ցուցակը գլխավորելու կամ հետագայում այլ պաշտոն վարելու մասին մամուլի հրապարակումները: Ըստ նախարարի, այդ լուրերը լրատվամիջոցների հնարքն են՝  աղմկոտ վերնագրերի միջոցով մեծ լսարան գրավելու նպատակով: «Ես ամենաերջանիկ մարդը կլինեի, եթե շարունակեր այն պատասխանատու աշխատանքը, որը վստահվել է ինձ:Ամենաերջանիկ մարդը կլինեի, եթե ընտրություններում մեր գրանցած արդյունքը թույլ տար շարունակելու այս աշխատանքը այնքան ժամանակ, որքան հնարավոր կլինի` մեր զինված ուժերի կարողությունները ամրապնդելու, մեր պաշտպանունակությունը բարձրացնելու համար», - ասել է պաշտպանության նախարարը: