Եթե Ելքը առաջարկ կատարեր, ես կդիտարկեի, այս պահին դիտարկում եմ Ազատ դեմոկրատներինը․ Ս․ Սաֆարյան

2017 թվականի խորհրդարանական ընտրություններում համամասնական ցուցակում ներգրավելու վերաբերյալ քաղաքագետ Ստյոպա Սաֆարյանը վերջնական որոշում չի կայացրել, բայց այս պահին «առաջին հերթին դիտարկում է» Ազատ դեմոկրատների առաջարկությունը։ Այս մասին Hayeli.am-ի հետ զրույցում ասաց Ստյոպա Սաֆարյանը․ -Պարոն Սաֆարյան, Ազատ դեմոկրատներից ստացե՞լ եք առաջարկ, համապատասխանո՞ւմ է այն իրականությանը։ -Դեռ մեկ տարի առաջվանից կային առաջարկներ, այն ժամանակ ասել եմ, որ վերջնական որոշում չունեմ, բայց տարեվերջին թերեւս արդեն մտածեցի՝ ինչո՞ւ ոչ։ Ազատ դեմոկրատների ղեկավարը (Խաչատուր Քոքոբելյան. հեղ․)դեռ դեկտեմբերից ակնարկեց, որ կցանկանար զրուցել, զրույցը տեղի ունեցավ տոներից հետո, բայց վերջնական համաձայնություն դեռ չկա։ Այս պահին որպես ռեալ առաջարկ դիտարկում եմ Ազատ դեմոկրատների առաջարկը, բայց նորից եմ կրկնում պայմանավորվել ենք ազնվորեն, որ վերջնական համաձայնությունների մասին ավելի ուշ խոսենք։ -Իսկ այլ ուժերից եղե՞լ են առաջարկներ։ -Ես անուններ չեմ տա, քանի որ մամուլը տեղեկացել էր այդ հանդիպման մասին, ուղղակի դրա համար չեմ հերքել, բայց մյուսների անունները չեմ տա։ -Ինչո՞վ է հոգեհարազատ հենց Ազատ դեմոկրատները, որ ավելի շատ հակված եք իրենց առաջարկությունն ընդունել, որովհետև կարծես թե տպավորություն կար, որ Ելք դաշինքի հետ կհամագործակցեք։ -Բուն Ելքի հետ դեկտեմբերի 12-ից հետո որեւէ քննարկում չեմ ունեցել, Ելքի առանձին կուսակցությունների ղեկավարների հետ եղել են նախնական քննարկումներ, բայց առաջարկ չի ձեւակերպվել։ Ես որ ասացի, որ մի քանի հարթակներ կան, որ կարող են դիտարկել իմ մասնակցությունը, դրանցից մեկը Ելքն է, բայց ես իրենց կողմից որեւէ առաջարկ չեմ ստացել։ Սա այն խնդիրը չէ, որ ինքս ինձ մատուցեմ եւ առաջարկեմ, հիմա բոլորն են փնտրում քաղաքական ճանաչելիության մարդկանց, որոնք համապատասխանում են իրենց պատկերացումներին, եթե Ելքը նման առաջարկ կատարեր, ես կդիտարկեի այն։ Ես դիտարկում եմ Ազատ դեմոկրտաների առաջարկը, որովհետև այն շատ կոնկրետ է, իսկ Ելքից նման առաջարկ չեմ ստացել։ -Պարոն Սաֆարյան, Ձեր նախկին կուսակցության՝ Ժառանգության հետ որեւէ քննարկում, առաջարկ չի՞ եղել։ -2013 թվականի վերջերից, երբ արդեն ակնհայտ էր, որ ստեղծում եմ հիմնադրամը, չեմ մասնակցել Ժառանգություն կուսակցության ոչ գործունեության, ոչ որոշումների ընդունմանը, այս տարիների ընթացքում ազատ են եղել իերնց պատկերացւոմներով տանել քաղաքական գիծը։ Փաստացի իրենց վարած բանակցությունները ցույց են տալիս, թե իրենք ինչպես են տեսնում  իրենց հետագա քաղաքական գործունեությունը․խոսքը վերաբերում է այն բանակցություններին, որոնցում ներքաշված են եւ որոնց հետ կապված տարաձայնություններ են առաջացել կուսակցության ներսում։ Ես առաջարկ չեմ ստացել, չեմ պատկերացնում, որ կստանամ․ ես ինքս ինձ չեմ տեսնում այն դաշինքում, որի վերաբերյալ քննարկումներ են ընթանում։ Անկեղծ ասեմ՝ չեմ սպասում առաջարկի։ Սեդա Ղուկասյան