Վրաստանը հույս ունի Ադրբեջանից ստանալ հավելյալ ծավալի բնական գազ

Sputnik-ը հայտնում է,որ Վրաստանի իշխանությունները հուսով են Ադրբեջանից հավելյալ ծավալի բնական գազ ստանալ Հարավ-կովկասյան խողովակաշարով։ Այդ մասին լրագրողների հետ զրույցում հայտարարել է Վրաստանի էներգետիկայի նախարար Կախա Կալաձեն։ «Վրաստանի կառավարությունը 2011 թվականից դիմել է Հարավ-կովկասյան խողովակաշարի կոնսորցիումին՝ խնդրելով հատկացնել հավելյալ ծավալի գազ, սակայն բանակցելու մասին մի քանի առաջարկների համար ստացել է մերժում: Ներկայումս բանակցությունները գտնվում են շատ ակտիվ փուլում, սակայն համաձայնագիրը դեռ ձեռք բերված չէ։ Բանակցությունների դրական արդյունքի դեպքում Վրաստանը կարիք չի ունենա ռուսական գազի այն ծավալին, որն ունի ներկայումս։ Ներկա դրությամբ խոսքը Ռուսաստանից 300-400 միլիոն խորանարդ մետր ստանալու մասին է։ Մենք ունենք մեր դիրքորոշումը, մենք անում ենք ամեն բան, որպեսզի մեր երկրի զարգացման համար ստանանք առավելագույն արդյունք։ Կարծում եմ, որ մենք կհասնենք որոշակի համաձայնության»,- ասել է Կալաձեն։