Սամվել Բաբայանի վերադարձի գաղտնիքը
Ապրիլյան քառօրյա պատերազմից հետո մեծ աղմուկով Հայաստան վերադարձած Սամվել Բաբայանը արտասովոր վարք է դրսեւորում: Բայց նախ սկզբից: Ի սկզբանե նա եկավ ու հայտարարեց, որ որեւէ կուսկցություն չի մտնելու, մեծ հաշվով քաղաքականությամբ չի զբաղվելու, եկել է Ղարաբաղին օգտակար լինելու համար, բայց եւ ակնարկեց, որ հարկ եղած դեպքում անմասն չի մնա քաղաքական գործընթացներից.<<Չեմ պատրաստվում անդամագրվել որևէ կուսակցության։ Բայց ես տեսնում եմ, որ կան մարդիկ, ովքեր գաղափարակիցներ են։ Այդ մարդիկ իրենց նոր մտածողությամբ կարող են լուրջ ազդեցություն թողնել նաև մյուս քաղաքական ուժերի վրա: Եվ ես մեծ հույս ունեմ, որ նրանք կունենան հաջողություն>>,- հայտարարեց նա դեռեւս վերադարձի իր անդրանիկ հարցազրույցում: Բաբայանը նույն հարցազրույցում քննադատեց նաեւ իշխանություններին ասելով, որ <<ի տարբերություն Ադրբեջանի՝ մինչև ապրիլյան թեժ մարտերը Հայաստանի քաղաքական վերնախավի օրակարգում, ցավոք, անվտանգության խնդիրը գլխավորներից չէր համարվում>>։ Ապա եզրահանգեց.<<Թիկունքում պետք է արդյունավետ պետական կառավարում լինի, քաղաքական առողջ դաշտ լինի, ու զարգացող տնտեսություն ունենանք, որպեսզի առաջնագծում խնդիրներ չունենանք>>, իսկ որ խնդիրներ կային ու դրանք շատ էին, չթաքցրեց Սամվել Բաբայանը: Հաջորդիվ Բաբայանը մեղմացրեց դիրքորոշումը՝ հայտարարելով, որ պատրաստ է իր խորհուրդներով օգնել, որպեսզի իշխանությունները փրկեն Արցախը: Սակայն նրա ռեւերանսները մնացին անպատասխան, իսկ քառօրյայում կորցրած հեկտարները՝ հակառակորդի ձեռքում: Թվում էր, թե այս իրավիճակում Սամվել Բաբայանը պետք է նախաձեռնողականություն ցուցաբերեր, առջեւում խորհրդարանական ընտրություններ են, որոնցով վճռվելու է հաջորդ իշխանությունների հարցը, ու քանի որ ինչպես ինքն էր հայտարարում, անհնար էր անտարբեր մնալ Արցախի խնդրին ու հայրենիք է վերադարձել գլխավորապես այդ պատճառով, սակայն նրա վարքը զարմացնում է: Տեւական լռությունից հետո երեկ նա armlur.am-ին հարցազրույց է տվել եւ քաղաքականություն մտնելու մասին հայտարարել.«Եթե քաղաքական ուժերը համախմբվեն, իհարկե, ես օգտակար կլինեմ, բայց, եթե չեն համախմբվում, իմաստ չունի քաղաքականությամբ զբաղվել», -ասել է Բաբայանը այդպես էլ չբացատրելով, թե ինչ է իր ուզածը: Օրինակ ինչ կապ ունի իր քաղաքականությամբ զբաղվելը ուրիշների համախմբվելու հետ, ինչու է ասենք երբեմնի առանցքային գործիչը սեփական քայլերը պայմանավորվում ուրիշների գործողություններով, եւ ոչ թե ինքը նախաձեռնում: Սամվել Բաբայանը, սակայն, հաջորդ հարցին պատասխանելով հերքել է ինքն իրեն.«Համախմբելու, միավորելու ցանկություն չունեմ, քանի որ ես քաղաքականությամբ չեմ զբաղվում», ասել է նա՝ պատասխանելով Սեյրան Օհանյանի քաղաքական հայտի եւ հնարավոր համախմբման մասին հարցին: Չի բացառվում, որ պարոն Բաբայանի մոտ նկատելի անորոշությունը պայմանավորված է քաղաքական դաշտի անորոշությամբ: Դեռ որեւէ բան հայտնի չէ, թե որ ուժերի հետ է համախմբվելու Սեյրան Օհանյանը, վերջինս ու Սամվել Բաբայանի հաճախակի հանդիպումների մասին մենք արդեն տեղեկացրել ենք: Սերժ Սարգսյանը դեռ արձակուրդում է ու կվերադառնա շաբաթվա վերջի, որից հետո էլ ամենքին կասի իրենց տեղի ու դերի մասին: Իսկ Սամվել Բաբայանն ինչպես երեւում է արմատական փոփոխություններ անելու մտադրությամբ չէ, որ վերադարձել է հայրենիք: Ըստ էության Բաբայանի հուժկու հարցազրույցներից Սերժ Սարգսյանն այնքան էլ չվախեցավ: Անի Սահակյան
Հետևեք մեզ Viber-ում
