Ավտովթար՝ Նորագավիթի «գաի պոստի» մոտ բախվել են Mercedes-ն ու ВАЗ 21099-ը. 4 վիրավորներից 2-ը երեխաներ են, մեկն էլ՝ հղի կին

Այսօր՝ հունվարի 13-ին, ավտովթար է տեղի ունեցել Երևանում: Ժամը 13:00-ի սահմաններում Նորագավիթի ճանապարհային ոստիկանության անշարժ պահակետի հարևանությամբ բախվել են ВАЗ 21099 մակնիշի 99 XX 998 համարանիշի և Mercedes C230 մակնիշի 01 DQ 050 համարանիշի ավտոմեքենաները: Ինչպես դեպքի վայրից հայտնում է ֆոտոլրագրող Գագիկ Շամշյանը, վթարի հետևանքով 4 հոգի մարմնական վնասվածքներով տեղափոխվել են Էրեբունի բժշկական կենտրոն: Դեպքի վայր են ժամանել ճանապարհային ոստիկանության 1-ին սպայական գումարտակի ծառայողները: Վթարի մասին ՃՈ օպերատիվ կառավարման կենտրոնի պատասխանատու հերթապահ Միքայել Աղաբեկյանը տեղեկությունը փոխանցել է Հայաստանի քննչական կոմիտեի Երևանի քննչական վարչություն, որտեղից ժամանել է հատկապես կարևոր գործերով ավագ քննիչ Դավիթ Մարտիրոսյանը, ում կողմից փաստի առթիվ նյութեր են նախապատրաստվում: Օպերատիվորեն ժամանել են նաև ապահովագրական ընկերությունների ներկայացուցիչները: Վիրավորներին առաջինը օգնության են հասել վթարի հարևանությամբ գործող «24 ժամ» սուպերմարկետի աշխատակիցները: Դեպքի վայրում հավաքվածները նշում էին, որ վիրավորներից 2-րը երեխաներ են, իսկ մեկն էլ՝ հղի կին: Ոստիկանությունն ու քննչական բաժինը պարզում են վարորդների և վիրավորների ինքնությունը: Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: