Նորք Մարաշի զինված խմբի գործով դատական նիստը հետաձգվեց

Կենտրոն և Նորք-Մարաշ համայնքների ընդհանուր իրավասության առաջին ատյանի դատարանում այսօր մեկնարկել է Նորք–Մարաշում 2015 թ. նոյեմբերին վնասազերծված զինված խմբի գործով երկրորդ դատական նիստը: Դատավորն Արմեն Բեկթաշյանն է: Գործով առաջին դատական նիստը, որը պետք է տեղի ունենար 2016 թավականի դեկտեմբերի 2-ին, հետաձգվել էր մինչև 2017 թվականի հունվարի 13-ը՝  մեղադրյալներից Պաշտպանության նախարարի նախկին տեղակալ Վահան Շիրխանյանի հանրային պաշտպանը բացակայում էր, իսկ գործում ներգրավված այլ հանրային պաշտպանները ժամանակ էին խնդրել նյութերին ծանոթանալու համար: Հրթական անգամ դատական նիստը հետաձգվեց:Նիստին ներկա չէր գործով ամբաստանյալ Վահան Շիրխանյանը: Վահան Շիրխանյանը հայտարարել էր, որ դատական նիստին չի կարող  մասնակցել, ի վիճակի է մասնակցել  միայն պատգարակով` պառկած վիճակում, քանի որ մեջքի, ոտքերի և սրտի շրջանում ցավեր ունի և չի կարող նստել: Վահան Շիրխանյանի պաշտպան Հայկ Ալումյանն էլ հայտարարեց, որ բժշկական ծառայության կողմից կազմված տեղեկանքը, որը ներկայացվել է դատարանին, կեղծ է, քանի որ արդեն մի քանի ամիս անկողնային ռեժիմ է նշանակված նույն բժշկի կողմից: Նիստը հետաձգվեց մինչև հունվարի 20-ը: Ըստ մեղադրական եզրակացության՝ 2015 թ. ապրիլից գտնվելով ՀՀ տարածքում որպես զինված խմբի ղեկավար՝ ներկայացվող Արթուր Վարդանյանը, ստեղծել ու ղեկավարել է ՀՀ քաղաքացիներից կազմված հանցավոր համագործակցություն, կազմակերպված խմբի կազմում ապօրինի կերպով ձեռք է բերել, պահել, փոխադրել և կրել մեծ քանակությամբ զենք, ռազմամթերք, պայթուցիկ նյութեր, պայթուցիկ սարքեր` նպատակ ունենալով Հայաստանի Հանրապետությունում իշխանությունը յուրացնել, այսինքն` զավթել` բռնություն գործադրելու կամ բռնություն գործադրելու սպառնալիքով, ինչը ավարտին չի հասցվել: