Մեր տնտեսությունն այսօր էլ ծանր վիճակում է.վարչապետ

15:37 - 13/հունվարի/2017

ՀՀ վարչապետ Կարեն Կարապետյան մամուլի ասուլիսին հակիրճ ներկայացրել է իր 100 օրվա պաշտոնավարման աշխատանքը, ներկայացրեց պետական կառավարման ախտորոշումը, թե ինչ է արվել. «Պետական կառավարման համակարգում բազմաթիվ խնդիրներ ունենք, և քայլ առ քայլ պետք է գնանք այդ խնդիրների լուծմանը, որ վարձատրությունը կախված լինի արդյունքից:Կառավարման համակարգում կոռուպցիոն ռիսկեր ունեցող բազմաթիվ տեղեր կան, որտեղ աշխատավարձերը չափազանց ցածր են, այդ իսկ պատճառով դա մակրոխնդիր է, որ դրված է մեր առաջ:Այս ընթացքում այցելել ենք 7 մարզ»: Վարչապետն անդրադարձավ տնտեսության ծանր վիճակի վերաբերյալ իր հայտարարությանը: «Մեր տնտեսությունը, ասել եմ, որ գտնվում է ծանր վիճակում։ Այսօր էլ այդ վիճակում է, սակայն դա չի նշանակում, որ կառավարելի չէ»,-ասաց նա: Մենք ներկայացրել ենք փոփոխությունների ծրագիր, և կոչ արեց կարդալ և դատել՝ դրանք կտրուկ փոփոխություններ նախատեսո՞ւմ են, թե ոչ. «Խնդրում եմ հասկանալ, որ տնտեսության այս մեծ համակարգը մի օրվա մեջ փոփոխելու հնարավորություն չկա, և մեր խնդիրն է ամենօրյա աշխատանքում ազդակները ներկայացնել, որ քաղաքացիները դա զգան: Մենք ասել ենք, որ բաց ենք և համոզված եմ, որ գնում ենք ճիշտ ուղղությամբ»,-ասաց նա:

Հարցին, թե ինչպես է կարողանում «լեզու գտնել» օլիգարխների հետ, վարչապետը պատասխանեց,որ օլիգարխների հետ իրեն շատ հանգիստ է զգում:

Նա պատասխանեց նաև հարցին, թե կցանկանա՞ր, որ կառավարությունն աշխատեր այնպես, ինչպես աշխատում էր «Գազպրոմ Արմենիան» իր ղեկավարման տարիներին: «Շատ, շատ: Էֆեկտիվ է աշխատել, ժամացույցի պես»,-ասաց նա և չնայած դրան՝ նկատեց, որ թեև «Գազպրոմի» թիմից գոհ է, բայց բիզնես և պետական մարմնի կառավարչի գործառույթները, պահանջները տարբեր են: