«Ադրբեջանը միայն երկու տարբերակ ունի». Ալեքսանդր Իսկանդարյան

«Կովկաս» ինստիտուտի տնօրեն, քաղաքագետ Ալեքսանդր Իսկանդարյանն այսօր լրագրողների հետ հանդիպման ընթացքում ասաց, որ ղարաբաղյան հարցն ու ղարաբաղյան կոնֆլիկտի կարգավորումը տարբեր են: «Մինսկի խմբի մասով լուրջ փոփոխություններ չեն եղել, արդեն մի քանի տարի է` համանախագահները չեն զբաղվում ղարաբաղյան հարցի կարգավորմամբ։ Նրանք փորձում են ոչ թե կոնֆլիկտը կարգավորել, այլ բռնության ռիսկերը նվազեցնել»,- ասաց քաղաքագետը Ինչպես փաստեց՝ Ադրբեջանը միշտ էլ ավելացնում է ռազմական գործողությունների ինտենսիվությունը. «Ադրբեջանն ունի միայն երկու տարբերակ` խոսք և զենք։ Խոսքերը որևէ արժեք չեն ունենում, և բոլորի ուշադրությունը գրավելու համար նա կրակում է»։ Խոսելով դիվերսիայի շուրջ ՀԱՊԿ գլխավոր քարտուղարության հայտարարության մասին, Ալեքսանդր Իսկանդարյանը համոզմունք հայտնեց, որ ՀԱՊԿ գլխավոր քարտուղար Նիկոլայ Բորդյուժայի խոսքերը Ադրբեջանի վրա ազդելու տարրերից են. «Դրանք պատասխան արձագանք են այն հանգամանքին, որ Ադրբեջանը չի պահում պայմանավորվածությունները: Ապրիլից հետո որոշակի փակ պայմանավորվածություններ էին ձեռք բերվել, իսկ ՌԴ-ն դրանում մեծ մասնակցություն էր ունեցել: Իրական չէ մտածել, որ Ադրբեջանը հետամուտ է լինելու պայմանավորվածությունների պահպանմանը»: Ըստ նրա՝ ՀԱՊԿ յուրաքանչյուր երկիր իր շահերն ունի, և պետք չէ հույսեր կապել նրա հետ. «Արցախը, օրինակ, ՌԴ-ի քաղաքական օրակարգի կիզակետում չէ, ավելի կարևոր հարցեր կան»: Սոնա Դավթյան