Գասպարյանին ու Կուտոյանին բարձր պարգեւներ շնորհելով` ծաղրի առարկա են դառնում
Մասնագիտական-քաղաքական-հասարակական շրջանակներում անցկացված բոլոր հարցումներով՝ անցնող տարվա «պռավալը» կամ ձախողումը ներքաղաքական կյանքի ամենաողբերգական դրվագի հետ է կապվում, խոսքը «Սասնա ծռերի» կողմից ոստիկանական ամենամեծ բազայի գրավման մասին է։ Փաստը տարատեսակ մեկնաբանությունների է արժանացել, դրանց մեջ խորանալու հարկ չկա, բայց հարկ կա հիշեցնելու ՝այդ օրերին բոլորից հաճախ տրվող հարցը հետեւյալն էր՝ որտեղ է ԱԱԾ-ն։ Այդ հարցի պատասխանը մինչեւ օրս գտնված չէ։ Որեւէ մեկն այդպես էլ չկարողացավ բացատրել՝ ինչպե՞ս է ստացվել, որ Երեւանի սրտի մեջ ահաբեկչական պլան է գծագրվել ու իրականացվել, եւ դրա մասին համապատասխան կառույցը տեղյակ չի եղել։ Սա այն ժամանակ նորանշանակ ԱԱԾ ղեկավար Գեորգի Կուտոյանի ձախողումն էր, իսկ հետո ծավալված հայտնի իրադարձությունների պատասխանատվությունը Կուտոյանի հետ կիսեց Վլադիմիր Գասպարյանը։ Ի դեպ՝ այստեղ մի նրբերանգ էլ կա, Վլադիմիր Գասպարյանն առաջին ոստիկանապետն է, որի օրոք բարձրաստիճան ոստիկաններ օրեր շարունակ պատանդի կարգավիճակում մնացին, մի քանի օրում երեք ոստիկան սպանվեց, բացի այդ էլ ոստիկանության ցուցաբերած վարքագծի արդյունքում մի ողջ թաղամաս՝ մեծից փոքր, տղամարդ ու կին, դարձան իշխանության ներկայացուցչին դիմադրող քաղաքացիական ակտիվիստներ։ Ոստիկանությունն ու ԱԱԾ-ն անցնող տարվա ընթացքում վարկանիշի այնպիսի անկում ապրեցին, որ դեռ երկար ժամանակ չեն կարողանալու հաղթահարել այդ շոկը։ Եվ հիմա՝ Գասպարյանին ու Կուտոյանին բարձր պարգեւներ շնորհելով, Սերժ Սարգսյանը ոչ թե ծաղրի առարկա է դարձնում այդ մարդկանց ի սկզբանե մերժող հասարակությանը, այլ այդ մարդկանց ենթակայության տակ մասնագիտական գործունեություն ծավալող շարքայիններին: Հոդվածն ամբողջությամբ կարող եք կարդալ «Չորրորդ իշխանություն» թերթի այսօրվա համարում
Հետևեք մեզ Viber-ում
