«Թուրքիան եթե անհրաժեշտ համարի, կդրդի Ադրբեջանին».Ռ.Սաֆրաստյան
«Հայ-թուրքական հարաբերություններում որեւէ փոփոխություն չեմ ակնկալում առաջիկայում Թուրքիան ներգրավված է մեծ խաղերում. Մերձավոր Արեւելքում ունի շատ ծանր ներքին խնդիրներ, ներքին քաղաքական իրադրությունը եւս սրվել է՝ կապված սահմանադրական փոփոխությունների հետ։ Հետեւաբար, չեմ կարծում, որ նման պայմաններում Էրդողանի կառավարությունը գնա հայ-թուրքական հարաբերությունների կարգավորմանը»,-Հայելի ակումբում հրավիրված ասուլիսում հայտարարեց թուրքագետ Ռուբեն Սաֆրաստյանը ։ « Թուրքիան ժամանակ առ ժամանակ կփորձի օգտագործել Արցախի հիմնախնդիրը՝ իր քաղաքական խնդիրները լուծելու համար։ Այսինքն, եթե Թուրքիան անհրաժեշտ համարի սրել Ադրբեջանի կողմից Արցախյան հիմնահարցը՝ հասցնելով նրան ագրեսիայի սահմանին, ապա ես կարծում եմ, որ նա այդ քայլին կգնա»,-ընդգծեց թուրքագետը՝ չբացառելով նաեւ, որ առաջիկա տարիներին մեծ տերությունների կողմից կսկսվի Մերձավոր Արևելքի նոր քաղաքական քարտեզի ձեւավորումը։ Այս առումով Հայաստանի դիվանագիտությունն անելիք ունի, քանի որ Հայաստանը կարեւոր աշխարհագրական եւ աշխարհաքաղաքական դիրք է գրավում Հարավային Կովկասում եւ Մերձավոր Արեւելքում։
Հետևեք մեզ Viber-ում
