Ազգայնականի և ազգայնամոլի տարբերությունը
Հայկ Խանումյանը գրում է. Ազգայնականը որպես կանոն որակյալ գիտելիքներ ունեցող անձ է, ով համարում է, որ ազգային զգացմունքներն այսօրվա աշխարհում ավելի ուժեղ են, քան քաղաքական գաղափարախոսությունները, դավանանքները և այլ զգացմունքները:Սովորաբար դեմ է վերազգային կառույցներին և կողմ է ազգ-պետություն գաղափարին, կողմ է տարբեր պետությունների հետ ակտիվ հարաբերություններին ի շահ իր երկրի, չի տառապում 'մետությամբ' (արևմտամետ, ռուսամետ և այլն), ունի ազգային երազանք և ձգտումներ, աշխատում է ազգային հզորության տարրերի ուժեղացման համար, մեր դեպքում հանդես է գալիս տարածքային զիջումների դեմ, քանզի դա ոչ կավելացնի ազգային հզորությունը, ոչ խաղաղություն կբերի, այլ կուժեղացնի թշնամուն և կբերի մեր պարտության: Չի թերագնահատում թշնամուն, նրան նվաստացուցիչ անուններով չի դիմում: Ազգայնամոլը սովորաբար մակերեսային գիտելիքներ ունեցող կամ ամբողջովին տգետ մեկն է, ով տառապում է կոնսպիրոլոգիական պատկերացումներով, իրեն ծնած էթնոսին վերագրում է միֆական հատկություններ, հանդես է գալիս կենցաղային հայրենասիրության դիրքերից, այլատյաց է, որոշ դեպքերում հիանում է ռասիստական ռեժիմներով և գործիչներով: Թշնամուն սովորաբար դիմում է նվաստացուցիչ անուններով` անուղղակիորեն նվաստացնելով նաև իր ժողովրդին: Հեռու է ազգի գաղափարներից, ունի կլանային մտածելակերպ և իրեն նույնացնում է կլանի, ոչ թե ազգի հետ: Ազգայնամոլները իրենց դիրքորոշումներով սովորաբար վարկաբեկում են ազգայնական գաղափարները:
Հետևեք մեզ Viber-ում
