«Այն հիմնական օղակները, որտեղ խնդիրներ կային՝ վերացնում ենք». Արտեմ Ասատրյան
ՀՀ աշխատանքի և սոցիալական հարցերի նախարար Արտեմ Ասատրյանն այսօր լրագրողների հետ հանդիպման ժամանակ հայտարարեց, որ մինչ այժմ սոցիալական համակարգերի խնդիրներին էվոլյուցիոն լուծումներ են փորձել տալ: Ինչպես տեղեկացրեց` բժշկասոցիալական ոլորտում առկա խնդիրների հետ կապված ևս փորձել են էվոլյուցիոն լուծումներ տալ` վերացնելով պատճառները: Նախարարը նշեց, որ հ/կ-ներին և բժիշկներին հնարավորություն էր տրվել մասնակցել փորձաքննությունների ժամանակ հանձնաժողովների նիստերին. «Սակայն էվոլյուցիոն ճանապարհն այլևս չի բավարարում, որովհետև տարիներ շարունակ եղած խնդիրները չեն լուծվում»: Ինչպես ասաց՝ Առողջապահության նախարարության հետ պատվիրակելու են այդ լիազորությունը հատուկ առողջապահական կազմակերպությունների, որոնց առջև շատ խիստ պահանջներ կդրվեն: Նրա կարծիքով` սրա արդյունքում մի շատ կարևոր խնդիր է նաև լուծվում, քանի որ շատ դեպքերում քաղաքացիները փորձաքննության գալիս լրացուցիչ ուղեգրվում էին բուժհաստատություններ, իսկ այժմ այդ լրացուցիչ փորձաքննության օղակը վերացվում է: «Այն հիմնական օղակները, որտեղ խնդիրներ կային, մեր կարծիքով՝ վերացնում ենք»,- ասաց նախարարը:
Հետևեք մեզ Viber-ում
