Վարչապետի հանձնարարությունը սոցապ նախարարին
«Սոցիալական ապահովության ոլորտում ահրաժեշտ են բարեփոխումներ ամբողջ սպեկտրով: Պետք է ստեղծենք համակարգեր, որ բացառենք կոռուպցիան»,- այսօր կառավարության նիստի սկզբում նախքան օրակարգին անցնելը հայտարարեց ՀՀ վարչապետ Կարեն Կարապետյանը` մի շարք հանձնարարականներ տալով գերատեսչությունների ղեկավարներին: «Հարկ է, որ պետությունը օգնության ձեռք մեկնի կարիքավորին, նրան ոտքի կանգնելու նեցուկ լինի, սակայն չստեղծի չաշխատելու խթաններ, լինի առարկայական՝ օգնելու անհատին դժվարին կացությունից դուրս գալու, բայց ոչ այդ պայմաններին սովորեցնելու համար: Սոցիալական պետական ծրագրերը պետք է այնպես մշակվեն, որ օգնությունը երբեք չբերի չարաշահումների, կոռուպցիոն դրսևորումների, առաջինը հասնի ամենակարիքավորներին, չաղավաղի սոցիալական արդարությունը», ասաց Կարեն Կարապետյանը:Նա անդրադարձավ բժշկասոցիալական փորձաքննությանը՝ նշելով, որ այստեղ էվոլյուցիոն ճանապարհով իրականացվող փոփոխությունները դեռևս հեռու են ցանկալի արդյունքից: Հետևաբար, ԲՍՓ-ում պետք է իրականացնել արմատական բարեփոխումներ: «Աշխատանքի և սոցիալական հարցերի նախարարին հանձնարարում եմ տասնօրյա ժամկետում առաջարկություններ ներկայացնել ոլորտի բոլոր բիզնես պրոցեսներում արմատական փոփոխություններ կատարելու վերաբերյալ՝ հիմքում դնելով սկզբունքային մոտեցումները», ասաց նա: «Ռեալ շատ կարևոր հանձնարարական է` պրինցիպիալ տրամաբանությունն ու փիլիսոփայությունը փոփոխող: Մենք ստեղծել էինք մի համակարգ, որտեղ աշխատունակ մարդը ցանկություն չունի աշխատանք փնտրելու, ամեն կերպ փորձում է սոցիալական անապահովության դաշտում հայտնվել և այդ իսկ պատճառով մեև սոցիալական նպաստների թիվն աճում էր, չէր հասնում նրանց, ում մոտ կարիք կար, դեմոտիվացնում էինք մարդկանց աշխատելու ցանկությունը»,- ասաց վարչապետը:
Հետևեք մեզ Viber-ում
