Ջունգլի նկատմամբ դատահոգեբանական համալիր հանձնաժողովային փորձաքննություն է նշանակվել. «Փաստինֆո»
«Ջունգլ» մականվամբ Գևորգ Սարգսյանի նկատմամբ դատահոգեբուժական, դատահոգեբանական համալիր հանձնաժողովային փորձաքննություն է նշանակվել: Այդ մասին «Փաստինֆո»–ն տեղեկացավ Գևորգ Սարգսյանի պաշտպան Թամարա Բաղդասարյանից: Երևանի Ավան և Նոր Նորք վարչական շրջանների ընդհանուր իրավասության դատարանը՝ նախագահությամբ Դավիթ Հարությունյանի, այսօր բավարարել է Գևորգ Սարգսյանի պաշտպան Թամարա Բաղդասարյանի միջնորդությունը՝ իր պաշտպանյալի նկատմամբ դատահոգեբուժական, դատահոգեբանական համալիր հանձնաժողովային փորձաքննություն նշանակվելու վերաբերյալ: Հիշեցնենք, որ դեկտեմբերի 2-ին Երևան քաղաքի Ավան և Նոր-Նորք վարչական շրջանների դատախազության ավագ դատախազը միջնորդություն էր ներկայացրել դատարան Գևորգ Սարգսյանի նկատմամբ ընտրված խափանման միջոց չհեռանալու մասին ստորագրությունը փոփոխելու և կալանավորումը որպես խափանման միջոց կիրառելու վերաբերյալ, ինչը դատարանը բավարարել է: Հիշեցնենք, որ ըստ մեղադրանքի՝ Սարգիս Ղուկասյանը և Գևորգ Սարգսյանը Վիկտոր Հովսեփյանի հետ ծեծի են ենթարկել Վարդան Թումանյանին՝ դիտավորությամբ նրա առողջությանը պատճառելով միջին ծանրության վնաս՝ ատողջության տևական քայքայումով:
