Խիստ կասկածելի շտապողականություն Ղարաբաղի հարցում
Մոսկվան համառորեն շարունակում է զարմացնել` ԼՂ խնդրի վերաբերյալ ուշագրավ հայտարարություններ անելով... Ռուսաստանն իրենից կախված ամեն ինչ կանի, որպեսզի Լեռնային Ղարաբաղի հակամարտության կարգավորման գործընթացը չդադարի, երեկ լրագրողների հետ հանդիպման ժամանակ նման հայտարարությամբ հանդես է եկել ՌԴ արտաքին գործերի նախարարության պաշտոնական ներկայացուցիչ Մարիա Զախարովան: «Ռուսաստանի Դաշնությունը զբաղվում է Լեռնային Ղարաբաղի հակամարտության կարգավորման հարցով որպես ԵԱՀԿ Մինսկի խմբի համանախագահ: Մեզնից կախված ամեն ինչ կարվի, որպեսզի կարգավորման գործընթացը չդադարի, այլ ընդհակառակը` ինտենսիֆիացվի: Ինչ վերաբերվում է հանդիպումների կոնկրետ գրաֆիկին, ապա դրա վերաբերյալ տեղեկատվությունը կտրամադրվի այն ժամանակ, երբ նման տեղեկատվություն ստացվի», հավելել է ՌԴ ԱԳՆ ներկայացուցիչը: Իսկ միթե ղարաբաղյան կարգավորման գործընթաց գոյություն ունի՞... Դեռ ապրիլյան քառօրյա պատերազմից շատ առաջ` ղարաբաղյան կարգավորման գործընթացը հայտնվել էր փակուղում, դա ոչ մեկի համար գաղտնի չէ: Սակայն պարզվում է, Մոսկվայի համար, ղարաբաղյան կարգավորման գործընթացն այժմ ոչ միայն չի դադարել, այլև այն չպետք է թույլ տալ, որ կանգ առնի: Մոսկվան, վստահաբար, նկատի ունի ռուսական ջանքերը, որոնք ակտիվացրել են հատկապես ապրիլյան քառօրյայից հետո, երբ պարզ դարձավ, որ Ալիևը ընդունակ չէ անգամ միջնորդների կոնկրետ պահանջներն ընդունել: Ու այս վիճակում, երբ հայկական կողմը պահանջում է, որ միջնորդներն Ալիևին կարգի բերեն, որ նա ընդունի սահմանային միջադեպերի ուսումնասիրության մեխանիզմների ներդրումը և ԵԱՀԿ նախագահի անձնական ներկայացուցչի գրասենյակի ընդլայնման գաղափարը, հանկարծ Մոսկվան ղարաբաղյան կարգավորման գործընթաց է տեսնում: Մոսկվայի ակտիվ ջանքերին զուգահեռ ձայնակցում է նաև պաշտոնական Բաքուն... Ադրբեջանը դեմ է, որ ղարաբաղյան խնդրի կարգավորումը դառնա որևէ միջազգային կառույցի մենաշնորհը, հայտարարել է արտգործնախարար Էլմար Մամեդյարովը: «Բաքուն շարունակելու է այս հարցը մտցնել միջազգային բոլոր կազմակերպությունների օրակարգ, քանի դեռ հայկական ագրեսիայի հետևանքները չեն վերացվել, Ադրբեջանի տարածքային ամբողջականությունը չի վերականգնվել»,- ասել է Ադրբեջանի արտգործնախարարը: Այսինքն, ստացվում է, որ Մոսկվան ու Բաքուն միահամուռ ուժերով հանդես են գալիս ընդդեմ ԵԱՀԿ Մինսկի խմբի ու առաջ են տանում Ռուսաստանի ջանքերը, այլ կերպ ասած` «Լավրովի պլանը»: Թամար Բագրատունի
Հետևեք մեզ Viber-ում
