Դաշնակցությունը չի նահանջում. Արծվիկ Մինասյան
ԲՆապահպանության նախարար Արծվիկ Մինասյանը, պատասխանելով լրագրողների հարցին, թե իր արդյունավետ աշխատանքը կարո՞ղ է նպաստել Դաշնակցության քվեների ավելացմանը, ասաց. «Բնականաբար, լինելով քաղաքական պաշտոնում նշանակված անձ և լինելով ՀՅԴ անդամ՝ ես ակտիվորեն ոչ միայն պետք է մասնակցեմ առաջիկա ընտրություններին, այլև պետք է առաջ տանեմ իմ կուսակցության գաղափարները, մոտեցումները»: Ինչպես նշեց՝ իրեն համար առաջնային երեք փաստաթուղթ կա` խմբագրված Սահմանադրություն, նախագահի` փետրվարի 12-ի ելույթ և ՀՅԴ-ՀՀԿ քաղաքական համաձայնագիր: «Այս երեք փաստաթղթերով հանդերձ` կա հստակ տեսլական` տեսնել Հայաստանն ավելի բարեկեցիկ, շրջակա միջավայրի տեսակետից` ավելի բարելավված և կայուն զարգացում երաշխավորող համակարգերով: Ես ամեն ինչ անելու եմ, որ մեր ընտրողները տեսնեն, որ այն, ինչ հայտարարվում է Դաշնակցության կողմից, նահանջ չկա»,- ասաց Արծվիկ Մինասյանը: Նախարարը համոզմունք հայտնեց նաև, որ ընտրողների ձայների մի զգալի հատվածը պայմանավորված է լինելու նաև այն կուսակցության պատասխանատուի աշխատանքով, որը կառավարության անդամ է, և որի վարքագիծը կապված է կուսակցության վարքագծի հետ: «Ես ամեն ինչ անելու եմ, որ մեր ընտրողները տեսնեն, որ այն, ինչ հայտարարվում է Դաշնակցության կողմից, չի մնում թղթի վրա»:
Հետևեք մեզ Viber-ում
