Բնապահպանության նախարարությունը պետք է լինի ագրեսիվ. Արծվիկ Մինասյան

Բնապահպանության նախարարությունը պետք է լինի ագրեսիվ,  տարին ամփոփելով՝ այսօր հայտարարեց բնապահպանության նախարար Արծվիկ Մինասյանը: Անդրադառնալով Սևանա լճում տեղի ունեցող որսագողության դեպքերին, նա ասաց, որ մինչև դեկտեմբերի 25-ը նախատեսված էր լճում սիգի որսի սահմանափակման առաջին փուլը, և դրական տեղաշարժ է արձանագրվել: «Ամբողջությամբ բավարարված չենք, բայց մեր գնահատմամբ՝ հնարավոր եղել է շուրջ 80%-ով պահպանել այն հնարավորությունը, որ սիգը կարողանա բնական ճանապարհով իր վերարտադրության ընթացքն ունենալ: Այն արգելքը, որ դրված է այսօր, բացարձակ արդյունավետությամբ չի փայլում: Հասարակության մոտ էլ օբյեկտիվ պահանջ կա՝ օգտվելու Սևանի հնարավորություններից, և պետք է փորձենք այս համատեքստում լուծում տալ: Հետևաբար՝ նախարարությունը ոչ միայն պետք է պահպանման մասին մտածի, այլ նաև պահպանման խնդիրը տեսնենք նաև համայնքներում՝ տարբեր աշխատանքների միջոցով»,- ասաց նա: Նախարարն անդրադարձավ նաև Ամուլսարի հանքավայրի շահագործմանը եւ վստահեցրեց, որ բոլոր գործընթացներն իրականացվել են փորձաքննությունների հիման վրա, իսկ ահա փորձաքննություններն օրենքի շրջանակում տվել են դրական եզրակացություն: «Փորձաքննության այն համակարգը, որը գործում է Հայաստանում, ես գտնում եմ ոչ բավարար: Այն պետք է ուժեղացնենք այն աստիճան, որ հասարակության մոտ չառաջանան այդ հարցերը, բայց ես՝ որպես Սահմանադրությունն ընդունող եւ օրենք հարգող մարդ, շարժվելու եմ օրենքով»: