ՀՅԴ-ն հետեւում է Սեյրան Օհանյանին

Հայելի ակումբում լրագրողների հետ հանդիպման ժամանակ, ՀՅԴ ԳՄ ներկայացուցիչ,  ԱԺ ՀՅԴ խմբակցության քարտուղար Աղվան Վարդանյանն ամփոփեց տարին:2016-ը նոր սկզբի հնարավորություն էր մի քանի առումներով, նախ` 2016-ը սկսվեց կառավարման նոր համակարգով, նոր Սահմանադրությամբ, ինչը համակարգային փոփոխության հնարավորություն էր: 2016-ը նաև համակարգային փոփոխության տարի էր` ընտրական նոր օրենսգրքի ընդունման առումով, այն աշխուժություն մտցրեց քաղաքական դաշտում:«2016 թվականը Հայ Հեղափոխական Դաշնակցության համար նոր սկզբի տարի էր»,- ասաց նա: Խոսելով առաջիկա խորհրդարանական ընտրությունների մասին, պարոն Վարդանյանը նշեց, որ ողջունում է քաղաքական ցանկացած միավորում, դաշինք։ Հարցին, թե հնարավո՞ր է՝ ընտրություններից հետո ՀՅԴ-ն կոալիցիա կազմի ՀՀԿ-ի հետ, Ա. Վարդանյանն այսպես պատասխանեց. «Կախված ընտրությունների արդյունքներից՝ կխոսենք այդ մասին։ Մեր համաձայնագիրն անժամկետ է, ու, եթե ԱԺ ընտրությունները հնարավորություն կտան, մենք ունենք խնդիրների հսկայական շրջանակ, որոնք կարող ենք լուծել»։ Այնուհետև անդրադարձավ նաև Սեյրան Օհանյանի և Գագիկ Ծառուկյանի՝ քաղաքականություն վերադառնալուն: Ինչպես ասաց՝ դա նրանց իրավունքն է. «Սեյրան Օհանյանը նոր չի մտնում քաղաքականություն, նա քաղաքական պաշտոն է  զբաղեցրել,եղել քաղաքական թիմի անդամ, ուղղակի ինձ  շատ հետաքրքիր է, թե ինչ ձևաչափով, ինչ թիմով, ինչ քաղաքական ուժով կգա ասպարեզ, Մենք հետևում ենք բոլոր քաղաքական գործիչների աշխատանքին»։