Ի՞նչ կապ ունի Նաիրա Զոհրաբյանը սպանված կուրսանտի հետ. փաստաբանի արձագանքը /տեսանյութ/

«Գոյություն ունի անմեղության կանխավարկած և բոլորը պետք է հարգեն դա: Առավել ևս պաշտոնյաներից որևէ մեկը իրավունք չունի հայտարարություն անի, թե անձը կատարել է հանցագործություն»,-լրագրողների հետ զրույցում անդրադառնալով փետրվարի 4-ին Ավան և Նորք Մարաշ վարչական շրջանների ընդհանուր իրավասության դատարանում, ԲՀԿ խմբակցության ղեկավար Նաիրա Զոհրաբյանի հայտարարությանը, ասաց փաստաբան Արա Զաքարյանը: Հիշեցնենք, որ շարունակվում է Վազգեն Սարգսյանի ռազմական ինստիտուտի   կուրսանտ, դաժանաբար սպանված Հայկազ Բարսեղյանի գործով դատավարությունը: Մահացած կուրսանտի հարազատներին սատարելու համար դատարան եկած քաղաքական գործիչը լրագրողների հետ զրույցում հայտարարել էր, որ ցինիզմ է համարում այս գործը ինքնասպանության վերագրելուն միտված ցանկացած հայտարարություն: Նշենք, որ Արա Զաքարյանը հանդիսանում է համածառայակցին սպանելու մեջ մեղադրվող Գնել Թևոսյանի շահերի պաշտպանը: «Ինձ համար զարմանալի է, որ եթե դատաքննությունը նոր է սկսվում անձի մոտ ինչպես կարող է հստակ ձևավորված համոզմունք  լինի, որ հանցագործություն է կատարված կամ սպանություն է կատարված: Սա առաջինը, երկրորդը չեմ բացառում, որ Նաիրա Զոհրաբյանը ազգակցական կամ այլ կապերի մեջ լինի Հայկազ Բարսեղյանի հետ և այդ շահերից էլ ելնելով նման հայտարարություն անի», -ընդգծեց պաշտպանը: Պաշտպանը նշեց, որ ինքը դեռ չի կարող ասել պատգամավորի հնչեցրածի առնչությամբ որոշակի գործողությունների կդիմի, թե ոչ. «Այս պահին ձեռնպահ կմնամ, հետո չգիտեմ...»,-եզրափակեց Արա Զաքարյանը: Հիշեցնենք, որ Հիշեցնենք, հունվարի 29-ին՝ ժամը 06:35-ի սահմաններում, հայտնաբերվել էր Հայկազ Բարսեղյանը՝ պտտաձողի վրա պարանով կախված վիճակում: Նշենք, որ  ՀՀ քննչական կոմիտեում հարուցված քրեական գործով մեղադրանք է առաջադրվել Հայկազ Բարսեղյանի 4 համածառայակցի: Նույն զորամասի զինծառայողներ Վաչե Սահակյանին, Մովսես Ազարյանին, Գնել Թևոսյանին և Նորիկ Սահակյանին մեղադրանք է առաջադրվել ՀՀ քրեական օրենսգրքի 104-րդ հոդվածի 2-րդ մասի 7-րդ և 10-րդ կետերով՝ մի խումբ անձանց կողմից խուլիգանական դրդումներով սպանության համար: Դեպքից հետո հարուցվել է նոր քրեական գործ՝ ՀՀ քրեական օրենսգրքի 375-րդ հոդվածի 1-ին մասի հատկանիշներով։ Աստղիկ Ավագյան Մանրամասները՝ տեսանյութում