Սեյրան Օհանյանը Վիկտոր Դալլաքյանի համագումարին ներկա չէր
«Երրորդ հանրապետություն» կուսակցության 7-րդ արտահերթ համագումարին կուսակցության նախագահ Վիկտոր Դալլաքյանն իր ելույթում ներկայացրեց իրենց ծրագրային դրույթները: Ինչպես ասաց՝ իրենք ցանկանում են երկիրը դարձնել ժամանակակից ու մրցունակ պետություն, աջակցել ԼՂՀ զարգացմանն ու անվտանգությանը, իրականացնել ՀՀ շրջափակմանն ուղղված տնտեսական ու դիվանագիտական քայլեր, ինչպես նաեւ՝ իրականացնել հայերի գոյաբանության ճգնաժամի հաղթահարմանը, արտագաղթի կասեցմանը ու ներգաղթի կազմակերպմանը միտված քաղաքականություն, ՀՀ-Սփյուռք հարաբերությունները արմատապես փոխել ու որակական նոր աստիճանի բարձրացնել: Ըստ նրա՝ միայն ժամանակակից ու կենսունակ ծրագրերով հնարավոր կլինի ՀՀ-ն միջազգային ասպարեզում ընկալելի դարձնել որպես սեփական շահերով առաջնորդվող, կայուն ու բազմաբեւեռ ինքնիշխան երկիր: Նշենք, որ համագումարին Պաշտպանության նախկին նախարար Սեյրան Օհանյանը ներկա չէր: Հիշեցնենք, որ Ս. Օհանյանը որոշել է զբաղվել քաղաքականությամբ ընդդմադիր դաշտում: Ամիսներ առաջ տեղեկություններ տարածվեցին նաև այն մասին, որ ԱԺ-ում ՀՀ նախագահի ներկայացուցիչ Վիկտոր Դալաքյանը որոշել է կուսակցություն բացել: Այդ խոսակցությունները այպես էլ չզարգացան, սակայն այժմ Ս. Օհանյանը միացել է Դալաքյանին կուսակցություն ստեղծելու գաղափարին և պատրաստ է համագործակցել:
Հետևեք մեզ Viber-ում
