Հայաստանի շոշափելի, բայց դեռեւս չամրագրված միակ ձեռքբերումը

«Երրորդ հանրապետություն» կուսակցության արտահերթ համագումարի ժամանակ Վիկտոր Դալլաքյանը հայտնել է, որ «Երրորդ Հանրապետություն» կուսակցությունը դավանում է լիբերալ-պահպանողականության արժեքային համակարգին: «Առաջիկա խորհրդարանական ընտրությունները ոչ թե պատճառ, այլ սոսկ առիթ են նման ձեւաչափերի առարկայացման ու բյուրեղացման համար, քանի որ վերջին տասնամյակում երկրի ներքին ու արտաքին քաղաքականության մեջ արձանագրված համատարած ձախողումների արդյունքում հայտնվել ենք ոչ միայն պետականության, այլեւ hայրենիքի կորստյան իրական վտանգի առջեւ։ 25-ամյա պատմություն ունեցող Հայաստանի առաջադրած փաստորեն միակ շոշափելի ռազմավարական նպատակը ԼՂ ազատագրման եւ նրա բնակչության անվտանգության ապահովման առաջադրանքն էր, որի փաստացի իրականացումը նորանկախ Հայաստանի շոշափելի, բայց դեռեւս չամրագրված միակ ձեռքբերումն է: Ղարաբաղյան պատերազմի ավարտը ազդարարող 1994թ. մայիսյան համաձայնագրի ստորագրումից հետո՝ արդեն հարաբերականորեն խաղաղ պայմաններում, գործնական-քաղաքական առումով, Հայաստանը որեւէ լուրջ, էական եւ առարկայական ռազմավարական նպատակ չի առաջադրել եւ իրականացրել մինչեւ վերջ: Իսկ երբ չկան ազգը համախմբող նպատակներ, ապա պետությունը՝ որպես դրանց իրականացման միջոց կամ գործիք, աստիճանաբար տարվում է ցանկացած համակարգին բնորոշ ինքնաբավարարման գործառույթով: «Երրոդ Հանրապետություն» կուսակցությունը որպես ծրագրային-ռազմավարական նպատակներ, հռչակում է՝ 1. Հայաստանը ժամանակակից, մրցունակ եւ կենսունակ պետություն դարձնելը, 2.  ԼՂՀ զարգացմանը, անվտանգության ապահովմանը եւ միջազգային ճանաչմանը առավելագույնս աջակցելը, 3. Հայաստանի ապաշրջափակմանը նպատակաուղղված տնտեսական, քաղաքական, դիվանագիտական եւ այլ  բնույթի քայլերի իրականացումը, 4. Հայաստանի եւ հայության  գոյաբանական ճգնաժամի հաղթահարմանը, Հայաստանի ժողովրդագրական վիճակի կտրուկ բարելավմանը, արտագաղթի կասեցմանը եւ ներգաղթի կազմակերպանը միտված քաղաքականության իրականացումը, 5. Հայաստան-Արցախ-Սփյուռք եռամիասնության փոխհարաբերությունները արմատապես բարեփոխելու եւ որակական նոր աստիճանի բարձրացնելու առաջադրանքի իրականացումը, 6. Հայաստանի ինքնիշխանության լիարժեք ապահովման ներքաղաքական,  տնտեսական ու դիվանագիտական համալիր ծրագրի իրականացումը»: